Олдинлари хоккей ўйналадиган мавсумларда футбол ҳақида янгилик у ёқда турсин оддий латифа ҳам эшитмасдик. Энди эса хоккей деган ўйин борлигини кўпчилик унутиб қўйган бўлса ажабмас. Ҳафта янгиликларга лиммо-лим бўлди. Айниқса, афсонавий Зико янги афсонага замин яратди. “Бунёдкор”ни ОЧЛ финалига олиб чиқишни ваъда берган бразилиялик мураббий ЦСКАни УЕФА кубоги финалига олиб чиқишни маъқул кўрди.

Сентябр ойи, Зико “Бунёдкор”га келган пайт!

Зико: — Ҳа, жаноб!
Мухбир: — Янги жамоа муборак! Бахтлимисиз?
Зико: —  Албатта.
Мухбир: — Бу жамоага катта сумма учун келдингизми?
Зико: — Йўқ, бу гапни бошқа айтманг.
Мухбир: — Ушбу клуб билан катта ғалабаларга эришса бўладими?
Зико: — Билмадим. Кўрамиз.
Мухбир: — Хориждан мураббий олиб келишларига қандай қарайсиз?
Зико: — Тўғри қилишади, ётиб қолгунча отиб қол.
Мухбир: — Баъзи мураббийлар яхши таклиф тушса шартномани ҳам бузишади.
Зико: — Мен ундай мураббийлардан эмасман.
Мухбир: — Сизга ишонса бўладими?
Зико: — Ҳа, жаноб.

Январ ойи, энди ушбу суҳбатни пастдан тепага қараб ўқинг.

Ҳамза Ёқубов
Ушбу мақола 2009 йили “Чемпион” газетасида чоп этилган.