"ПСЖ" раҳбарияти Чемпионлар лигасида ғалаба қозониш учун жамоа бошқарувига Жозе Моуриньони таклиф этиш ниятида.
Sunday Express нашри хабарида ёзилишича, "Челси" бош мураббийи айни вақтда парижликларнинг асосий мақсади бўлиб турибди ва у шу мавсум давомидаёқ Парижда иш бошлаши мумкин.
Жозе Моуриньо шу йилнинг августида янгиланган шартномасига кўра лондонликлар билан 2019 йилга қадар ҳамкорлик қилиши кўзда тутилган.
Бироз вақт муқаддам мураббий ҳеч қачон ўз хоҳишига кўра "Челси"дан кетмаслигини айтган эди.
Парижликлар раҳбарияти ушбу португални ўз жамоаларини янги даражага олиб чиқиши мумкин бўлган мутахассис сифатида кўрмоқда.
Маълумот учун, Моуриньо 2 марта ЕЧЛни қўлга киритган ("Порту" ва "Интер" билан). "ПСЖ" раҳбари Моуриньо бу ишни ўз жамоаси билан ҳам такрорлаши мумкинлигига ишонч билдирмоқда.
Қайд этиш керакки, Жозе Моуриньо АПЛнинг янги мавсумини ишончли тарзда бошламади. Лондонликлар 6 турдан кейин 7 очко билан турнир жадвалининг 13-ўрнига жойлашган.
Моуриньо жамоага 2013 йилда қайтганди. 2014-15 йиллар мавсумида у жамоа билан АПЛда чемпион бўлди.
"ПСЖ"да эса 2013 йилдан буён Лоран Блан бош мураббий сифатида ишламоқда. Жорий мавсумнинг 6 туридан кейин "ПСЖ" 14 очко жамғарган ва турнир жадвалида пешқадамликни қўлига олган. Парижликлар Блан мураббийлигида ўтган 2 мавсумда ҳам Францияда чемпионликни нишонлади.
