Газетамизнинг 17 сентябрь кунги 74 (1282)-сонида «Кутиб олинг, келажак ҳимоячилари» номли мақола чоп этилган бўлиб, унда жаҳоннинг 10 нафар иқтидорли ҳимоячилари борасида сўз юритилганди. Биз ушбу анъанани давом эттириб, бу сафар Sports.ru сайти мухбирлари томонидан эътироф этилган жаҳоннинг10 нафар энг яхши таянч ярим ҳимоячилари фаолиятларига назар ташлаймиз. Шунингдек, олдинги мақоламизда бўлгани каби, 3 йил аввал мазкур рейтингда қатнашган футболчиларнинг ҳозирги фаолиятларига ҳам эътибор қаратамиз.          

10. Деле АЛЛИ

Мамлакати: Англия

Клуби: «Тоттенхэм»

Туғилган санаси: 1996 йил 11 апрель

Бўйи: 188 см.

Алли бир йил аввал «МК Донс»дан «Тоттенхэм»га ўтганди. Англия кубоги баҳсларида иштирок этиб, «МЮ»ни йирик ҳисоб(4:0)да мағлубиятга учратилишига ўз ҳиссасини қўшди. Мавсум давомида Англия учинчи дивизионида ўтказилган учрашувларда рақиблар дарвозасига 16та гол урди. 7та ўйинни жароҳати туфайли ўтказиб юбормаганида, Деле рақиблар дарвозасини балки бундан ҳам кўпроқ ишғол этармиди... «Тоттенхэм» ёш ярим ҳимоячи учун январда 5 млн. фунт тўлади. «Лестер»­га қарши учрашувда АПЛдаги дебют голини нишонлади.

№-10 (уч йил аввал) - Эсекиэль Чирильяно: - «Верона»да ярим йил ижарада ўйнади, кейинчалик «Ривер Плейт» маш­ғулотларида иштирок этди. Якунда АҚШнинг «Даллас» клубига ўтиб кетди.

9.  УОЛАС

Мамлакати: Бразилия

Клуби: «Гремио»

Туғилган санаси: 1995 йил 4 апрель

Бўйи: 188 см.

Узун оёқли Уолас рақибдан тўпни олиб қўйиб, жамоадошларини тўп билан таъминлашда фаоллик кўрсатади. Уолас ҳужумкор ғояларга эга, майдонни яхши кўра олади.  Бироқ бразилиялик таянч ярим ҳимоячисининг салбий жиҳатлари ҳам етарли. Икки учрашувнинг бирида албатта, майдонни сариқ карточка билан тарк этиши унинг салбий тарафларидан биридир. Яқинда  «Флуминенсе» билан бўлиб ўтган ўйиннинг иккинчи 45 дақиқасида майдондан четлатилди. Оқибатда, «Гремио» тезда дарвозасидан гол ўтказиб юбориб, рақибларига имкониятни бой берди. Уолас Placar журнали талқини бўйича бразилиялик таянч ярим ҳимоячилари орасида 6-ўринда туради (бу борада юқори поғонани унинг «Гремио»даги жамоадоши Рафаэл Кариока эгаллаб турибди).

№9 (уй йил аввал) - Африйе Аккуа: «Хоффенхайм»дан «Парма»га ижара футболчиси сифатида қўшилган ярим ҳимоячи ўтган мавсум «Сампдория» дарвозасини ишғол қилганди. Ёзги трансферлар мавсумида эса «Торино» аъзосига айланди.

8. Годфред ДОНСА

Мамлакати: Гана

Клуби: «Болонья»

Туғилган санаси: 1996 йил 7 июнь

Бўйи: 175 см.

«Палермо» ўринбосарлари таркибида фаолият олиб борган ярим ҳимоячи «Кальяри» футболчисига айланганидан сўнг ўзини ижобий томондан кўрсатди.

Мураббий Жанфранко Зола футболчининг майдонга тушишига имконият яратиб берди ва билдирилган ишонч оқланиб, Годфред дебют учрашувида «Чезена» дарвозасига ғалаба тўпини киритди. «Кальяри»да мураббийлар штаби ўзгарганидан сўнг Зденек Земан ярим ҳимоячини захира ўриндиғида олиб қолаётганди. Лекин ганалик иқтидорли ярим ҳимоячи ўрнига клубда муносиб ўринбосар топилмади.  Футболчига Англиянинг бир қатор етакчи клублари ҳамда «Ювентус» қизиқиш билдирган бир пайт­да  Годфред шундай деди: «Ойим Ганадаги барда Англия футболини томоша қилишим учун 2 евро ажратарди. Дастлаб, «Челси»га мухлислик қилдим ва ўзимга кумир сифатида Майкл Эссьенни танладим. Менда унинг футболкаси ҳам бор эди. Машина ёки пул ҳақида кўп ўйламайман, асосий орзуим Англия премьер-лигаси клубларида тўп суриш».

№ 8 (уч йил аввал) - Лука Бегонья: - Москванинг «Локомотив» клубидан таклиф бўлишига қарамай, «Задар»да қолди. Жорий йил ёзида Загребнинг «Локомотив» жамоаси футболчисига айланди.

7. Данило БАРБОЗА

Мамлакати: Бразилия

Клуби: «Валенсия»

Туғилган санаси: 1996 йил 28 февраль

Бўйи: 182 см.

Таниқли футбол агенти Жорже Мендешнинг мижозига айланган Данило ёшлар ўртасидаги жаҳон чемпионати ўтказилгунга қадар «Васко да Гама»да дебютини нишонлади. Данило Бразилия «В» сериясида бироз ўйнагач, «Брага»га ўтди. Португалия клуби мураббийи Сержиу Консейсау Барбозани ўтган йилнинг сентябрида жамоа собиқ сардори Куштодиунинг ўрнида синаб кўрди. Январда 2та гол урган Данило июнда ёшлар ўртасидаги жаҳон чемпионатига Бразилия терма жамоаси сардори сифатида йўл олди. Турнирда ажойиб гол муаллифига айланган футболчи орадан бир ой ўтиб Испаниянинг «Валенсия» клубига ижара футболчиси сифатида бориб қўшилди. Испанияликлар футболчини бир йилдан сўнг 15 миллион евро эвазига сотиб олиш шарти билан келишув имзолашди. Данило нафақат иккинчи қаватда яхши ўйнайди, балки узоқ масофалардан ҳам кучли зарбалар йўллаб туради.

№7 (уч йил аввал) - Сржан Мияйлович: «Зенит»га ўтиши мумкин эди, бироқ  Туркиянинг «Кайсериспор» клубини танлади.

6. Жошуа КИММИХ

Мамлакати: Германия

Клуби: «Бавария»

Туғилган санаси: 1995 йил 8 февраль

Бўйи: 176 см.

«Штутгарт» тарбияланувчиси бир йил аввал ўтган Евро турнирида барчадан ажралиб турди. Киммих «Штутгарт»да муваффақиятли ўйин кўрсатмаган бўлсада, икки мавсум «РБ Лейп­циг»да шуҳрат қозонди. Ёш клуб бундеслиганинг иккинчи дивизиони мавсумини 5-ўринда якунлади, Киммих эса Kicker журнали талқини бўйича клубда энг яхши футболчи номига сазовор бўлди. «Бавария» ёзда Жошуани  8,5 миллион евро эвазига харид қилди ва «Боруссия» М клуби спорт директори Макс Эберлянинг танқидига учради: «Бавария»нинг трансфер сиёсати Германия футболи ривожланишига йўл қўймайди. Бу  жамоа ёшлар юқори даражадаги футболчи сифатида етишсагина унинг хизматларидан озмунча фойдаланади, холос».

№ 6 (уч йил аввал): Фернандо - «Гремио»нинг яна бир тарбияланувчиси Бразилия термаси билан Конфедерациялар кубогида ғолиб чиқди, икки йил «Шахтёр»да ўйнади. Бу мавсум 11 миллион евро эвазига «Сампдория»­га бориб қўшилди.

5. Леандер ДЕНДОНКЕР

Мамлакати: Бельгия

Клуби: «Андерлехт»

Туғилган санаси: 1995 йил 15 апрель

Бўйи: 188 см.

Дендонкер бир йил муқаддам «Андерлехт»нинг асосий таркиб футболчиси сифатида майдонда кўриниш бера бошлади. Дендонкер аксига олганда «Брюгге» мухлиси эди, бироқ «Андерлехт» скаутлари учун бу сабаб унчалик жиддий бўлиб кўринмади. Ўтган мавсум иккита гол урди ва Марк Вильмотс бошқараётган Бельгия терма жамоасида дебют ўйинини ўтказди.

№5 (уч йил аввал): Жордан Верету - Франция ёшлар терма жамоаси билан ЖЧ-2013 ғолиблигини қўлга киритган футболчи ўтган мавсумни ажо­йиб тарзда якунлади. «Нант» жамоасида 7та гол уриб, шунча марта ассис­тентлик вазифасини бажарган футболчи 10 миллион евро эвазига «Астон Вилла»га ўтди.

4. Озан ТУФАН

Мамлакати: Туркия

Клуби: «Фенербахче»

Туғилган санаси: 1995 йил 23 март

Бўйи: 182 см.

«Бурсаспор»нинг янги бош мураббийи Шенол Гюнеш Туфанни яна майдон марказига қайтарди. Озан жамоадошларига 9та голли пас бериш билан бирга, муҳим ўйинларда ўз ҳисобига гол ёзишга ҳам улгурди. Туфаннинг агенти ёзда «Валенсия»га ўтиш бўйича музокаралар олиб борди, лекин ярим ҳимоячи якунда 7 миллион евро эвазига «Фенербахче» футболчисига айланди.

№4 (уч йил аввал): Марко Верратти - 12 миллион евро эвазига «ПСЖ»га ўтди ва уч марта Франция чемпионлигини қўлга киритди. Шунингдек, Италия терма жамоасининг асосий футболчиларидан бирига айланди.

3. Рубен НЕВЕШ

Мамлакати: Португалия

Клуби: «Порту»

Туғилган санаси: 1997 йил 13 март

Бўйи: 180 см.

2014 йилги Евро мусобақасининг ярим финалига қадар етиб борган Португалия ёшлар терма жамоаси сардори турнирнинг энг яхши футболчилари қаторидан жой олди. Невешни 17 ёшида «Порту»нинг асосий таркибидан жой олади, деб ҳеч ким ўйламаганди. Устига-устак, Хулен Лопетеги Испаниядан марказий ярим ҳимояга бирданига уч футболчи - Каземиро, Оливера ва Кампаньёни олиб келганди. Невеш ёзги йиғинда аъло даражада қатнашиб, Португалия чемпионатининг 1-турида асосий таркибдан жой олди ва «Маритиму» дарвозасини ишғол қилди. Невеш «Ювентус», «Реал», «Ливерпуль», «Барселона» ва «Бавария» скаутларини ҳайрон қолдирди. Лекин унга қўйилган нарх (39 миллион евро) мазкур жамоаларга ёқмаганлиги аниқ.

№ 3 (уч йил аввал): Гранит Жака - 2012 йилдан буён «Боруссия» Менхен­гладбах жамоаси шарафини ҳимоя қилмоқда.

2. Адриен РАБЬО

Мамлакати: Франция

Клуби: ПСЖ

Туғилган санаси: 1995 йил 3 апрел

Бўйи: 191 см.

Адриеннинг «ПСЖ» билан профессионал шартнома тузишига (2013 йил «Манчестер Сити» кўригидан ўтган) онаси Вероника сабабчи бўлган. Рабьо ўтган мавсум Франция чемпионатида 4та гол урди. Отаси инфаркт билан касаллангани учун, ҳозирда фақат кўзини юмиб-очиш орқали суҳбатлаша олади.

№ 2 (уч йил аввал): Каземиро - «Реал» 6 миллион еврога харид қилди ва Анчелотти жамоасида бир оз муддат ўйнади. «Порту»да ижарада бўлиб қайтган ярим ҳимоячи ҳозирда яна «Реал»нинг асосий таркибига киришга ҳаракат қиляпти.

1. Юлиан ВАЙГЛЬ

Мамлакати: Германия

Клуби: «Боруссия» Д.

Туғилган санаси: 1995 йил 8 сент­я­брь

Бўйи: 186 см.

Вайгль бир йил аввал Германия терма жамоаси билан 19 ёшлилар ўртасидаги Европа чемпионатида ғолибликни қўлга киритганди.

Аммо «Мюнхен-1860» клубида унинг ишлари унчалик юришмади. 18 ёш бўлишига қарамай, жамоа тарихидаги энг ёш сардорга айланган Юлиан «Мюнхен»нинг янги мавсум стартидаги қаторасига 2та мағлубиятини кўтара олмади ҳамда 2-турдан сўнг 3 нафар жамоа­доши билан аламини спиртли ичимликдан олди. Оқибатда клуб раҳбарияти ва футболчи ўртасида можаро юзага келди. Шу тариқа Вайгль сардорлик боғичидан мосуво этилиб, 2та ўйинни захира ўриндиғида кузатишга мажбур бўлди. Аммо кейинчалик оқланиб, яна бошланғич таркибдан жой олди ва ўтган мавсумни ажойиб тарзда ўтказди. Кейинчалик Юлианни Дортмунднинг «Боруссия» жамоаси 2,5 млн. евро эвазига сотиб олди ва футболчи билан 2019 йилгача шартнома имзоланди. Янги жамоасида ҳам Юлиан ажойиб ўйин намойиш этмоқда. У ҳар бир учрашувда 2тадан самарали тўп оширишни амалга оширмоқда ва аниқ «пас» бериш бўйича бундеслиганинг энг яхши ярим ҳимоячилари қаторида бормоқда. 

 № 1 (уч йил аввал): Давид Алаба - филиппинлик ҳамшира ва нигериялик дижейнинг фарзанди «Бавария» билан кўплаб совринларни қўлга киритди. Шунингдек, кетма-кет 4 йилдан бери Австриянинг энг яхши футболчиси сифатида тан олинмоқда.

Акмал Эшонхонов тайёрлади