Чемпионлар лигасининг 2-турида "H" гуруҳида "Зенит" ва "Гент" жамоалари майдонга чиқишади. Питербургликлар илк турда сафарда "Валенсия"ни таслим қилиб 3 очко олишган бўлса, Белгияликлар ўз уйларида "Лион" билан муроса кўчасини танлаган эди.
Энг қизиғи мазкур жамоалар ҳали бирор маротаба ҳам рақиб бўлишмаган эди. Бугун улар бир-бирларига қарши илк учрашувни ўтказишади.
"Гент" ўз тарихида илк бора Чемпионлар лигаси гуруҳ босқичида иштирок этмоқда. Белг клуби шу кунга қадар 9 марта Европа лигаси (собиқ УЕФА кубоги), 2 бора Кубок Эгалари Кубоги ва 6 марта Интертато кубокларида иштирок этган.
"Гент" ўз тарихидаги ягона ютуғини ўтган йили қўлга киритган. Яъни клуб Белгия чемпионига айланган эди.
"Зенит" эса Чемпионлар лигасида еттинчи марта иштирок этмоқда. Питерликлар "Гент"дан фарқли ўлароқ бир қатор ютуқларни қўлга киритган. Яъни жамоа бир мартадан Европа лигаси ва Европа суперкубогида муваффақият қозонди. Шунингдек 4 марта Россия чемпионатида, икки бора Россия кубогида ва 3 марта Россия суперкубогида ғолиблик нашидасини сурди..
Бироқ бугун ушбу ютуқлар ҳеч қандай аҳамият касб этмайди. Ўйин олдидан кўпчилик мезбонларни фаворит ҳисобламоқда. Кўрамиз учрашув қандай кечаркан.
