Хорижда тўп сурадиган легионер футболчиларимизнинг сони яна биттага ортадиган бўлди. Озарбайжоннинг “Раван” клуби билан шартнома тузган Алибобо  Раҳматуллаев “Даракчи” газетасига шу ҳақда интервью берди.

— Алибобо, Озарбайжон чемпионати иштирокчиси “Раван” клубидан тушган таклиф қай тариқа рўй берди?
— Бу клуб мутасаддиларидан бири мен билан алоқага чиқиб, “Раван” бош мураббийи ўйинларимни кузатиб келаётганлигини ҳамда жамоага таклиф қилишни мақсад қилганини айтиб қолди. Шундан сўнг жамоа билан  шартнома туздим. Келишувимиз шу тариқа амалга оширилди. Очиғи, бундай таклифни кутмагандим. Негаки, мен “Навбаҳор” билан шартнома тузиб бўлгандим. Шу боисдан хориждан таклиф тушиши мен учун янгилик бўлди. Бу хабар бир томондан мени қувонтириб, ўзимга бўлган ишончни янада ошишига туртки бўлди десам янглишмаган бўламан.

— «Раван» жамоасида сизни қандай кутиб олишди?
— Барчаси зўр бўлди. Клубдаги мураббийлар, футболчиларни мени яхши кутиб олишди. Узоқ вақт бирга тўп сурган қадрдонлардек муомала қила бошлашди.

—  Умуман, бу жамоанинг янги мавсумдаги режалари қандай?
— Клуб янги мавсумда ўз олдига юқори мақсад ва вазифаларни қўйган. Шу боисдан ҳар бир ўйинда муносиб тарзда ўйнаб, ғалаба қозонишимиз кераклигини уқтиришди.

— Машғулотлар жараёни ҳақида нималарни айта оласиз?
— Жамоадаги муҳит, машғулотлар жараёни, шароитларнинг барчаси мени тўлақонли қониқтирди. Европача услубда футбол кўрсатилади. Бу эса ўйинчининг янада ўсиши ва малакасини ортишига сабаб бўлади.  Футболчи ўз олдига юқори мақсадларни қўйиши керак. “Раван”га бежиз келганимча йўқ. Жамоада кўпроқ ўйин амалиётига эга бўлиш тарафдориман. Шунингдек, қўйилган вазифаларни бажаришда боримни бериб, барчанинг ишончини оқламоқчиман. Шу орқали миллий терма жамоадан таклиф олишни режалаштирганман. Ахир, ҳар бир футболчи бош жамоада ўйнаб, халқаро мусобақаларда Ватани шарафини ҳимоя қилишни орзу қилади.