Испания Футбол Федерацияси президенти Анхель Мария Вильярнинг маълум қилишича, Висенте Дель Боске билан шартнома узайтирилмаслиги мумкин. Шу эҳтимол туфайли унинг ўрнига бошқа номзод изланмоқда.
64 ёшли мутахассиснинг федерация билан шартномаси 2016 йилнинг ёзига қадар амал қилади, аммо Дель Боскенинг ўзи ҳамкорликни давом эттиришни истамаяпти. Бу ҳақида As нашри хабар тарқатган.
Газетада ёзилишича, Вильяр Испания Европа чемпионатида ғалаба қозонса, Дель Боске ўз фикридан қайтиб, шартномани ЖЧ-2018 турнирига қадар узайтиришига умид қилмоқда.
Агар бундай бўлиб чиқмаса, Вильяр миллий терма жамоа бошқарувига Унаи Эмерини таклиф қилишга уриниб кўради.
Маълумот учун, Эмерининг “Севилья” билан 2017 йилнинг ёзига қадар мўлжалланган шартномаси мавжуд.
