"Пахтакор" - "Сўғдиёна" жамоалари учрашувидан кейин бош мураббийлар матбуот анжуманида иштирок этишди.

Нўъмон ҲАСАНОВ ("Пахтакор" бош мураббийи): - Ғалаба билан жамоа ва мухлисларни табриклайман. Уни туғилган кунини нишонлаётган Жамшид Искандеровга бағишлаймиз. Ўйин икки хил бўлимдан иборат бўлди. Дастлаб ташаббусга эга бўлиб, вазиятлардан фойдалана олмадик. Иккинчи бўлимда фаолроқ ўйнаб, беллашувни фойдамизга ҳал қилдик. Барча футболчи танаффусдан кейин жуда яхши ҳаракат қилди.

Лобановни жароҳати сабабли алмаштирдим. Биринчи бўлим ўрталарида у жароҳат қийнаётганини айтди. Уни захирага олишни сўраганимизда бўлим охиригача чидаб беришини таъкидлади, бироқ тўп ўтказиб юборилган вазиятда унга бу ҳолат панд берди.

Қийин ўйинлар энди бошланяпти. Сафарда бизни оғир кечадиган беллашувлар кутиб турибди. Ҳамма нарса олдинда. Биз яна 5 ўйинда майдонга тушамиз. Ўша баҳслар барча масалани ҳал этиб беради.