Олий лига жамоалари йигирма олтинчи тур учрашувларини 20 октябрь куни бошлашади. Шу куни “Локомотив” — “Бухоро”, “Машъал” — “Динамо” жамоалари майдонга тушади.
Турнинг қолган олти ўйини эса 21 октябрь куни ўтказилиши белгиланган. Унда “Бунёдкор” — “Пахтакор”, “Шўртан” — “Қизилқум”, “Нефтчи” — “Андижон”, “Сўғдиёна” — “Насаф”, “Навбаҳор” — “Қўқон-1912”, “Металлург” — “Олмалиқ” жуфтликлари ўзаро орани очиқ қилишади.
Ўзбекистон Профессионал футбол лигаси Ҳакамлар қўмитаси қарорига кўра, мазкур ўйинларни бошқарадиган ҳакамлар гуруҳлари номи эълон қилинди. Унга кўра, Ғузорда бўладиган “Шўртан” — “Қизилқум” жамоалари баҳсини пойтахтлик Ҳасан Рўзиев бошқариб боради.
Учрашувда унга лайнсменлар Бобур Қодиров, Абдураҳмон Қўлдошев (иккиси ҳам Бухоро)лар кўмаклашади.
Ёшлар лигаси доирасидаги баҳс бош ҳаками ва асосий таркиблар ўйини захира ҳаками этиб, нукуслик Ж. Жалимов тайинланган.
Пойтахтлик Олий тоифадаги ҳакам Сардор Нажафалиев учрашувлар назоратчиси сифатида Ғузорга ташриф буюради.
Ўзбекистон Профессионал футбол лигаси вакили Роман Черников комиссар этиб белгиланган.
Эслатиб ўтамиз, ёшлар лигаси баҳси 20 октябрь куни соат 14.00 да бошланса, асосий таркиблар ўйини 21 октябрь куни соат 16.00 да старт олади. Учрашув Ғузордаги “Марказий” стадионда бўлиб ўтади.
