2018 йилги жаҳон чемпионати учун Осиё минтақаси саралаш босқичи доирасидаги Фаластин ва Саудия Арабистони терма жамоалари ўртасидаги учрашув жорий йилнинг 5 ноябрь куни Фаластинда ўтказиладиган бўлди. Бу ҳақда ФИФА расмий сайти хабар тарқатди.
Аслида учрашув 13 октябрь куни бўлиб ўтиши лозим эди. Бироқ 7 октябрь куни ФИФА учрашувни номаълум муддатга қолдирганди.
Бунгача ОАВда мазкур учрашув учун Саудия Арабистони вакилларининг Иордан дарёсининг ғарбий соҳиллари орқали Исроил назорат қиладиган ҳудуддан ўтиб келишни исташмагани учун, ФИФА учрашувни Рамаллоҳдан (Фаластин) Амманга (Иордания) кўчириши ҳақида хабарлар тарқалганди.
Эслатиб ўтамиз, Саудия Арабистони Исроил мамлакатини тан олмайдиган мамлакатлар сирасига киради.
Якунда Фаластин томони рақибнинг хавфсизлигини тўлиқ таъминлаш учун кафолат бергач, ФИФА учрашувни мамлакат ҳудудида ўтказишга рухсат берди. Меҳмонлар хавфсизлиги учун ўша куни ҳукумат томонидан жавобгарлик ўз зиммаларига олинган.
