Олий Лига 27-тур доирасидан ўрин олган қизиқарли ўтиши кутилаётган матчлардан бири Олмалиқда “Олмалиқ” ва “Нефтчи” клублари ўртасида кечади. Мусобақа жадвалида ёнма-ён кетаётган ушбу икки клуб тўқнашуви кўпчилик мухлису мутахассисларда катта қизиқиш уйғотмоқда.

“Олмалиқ” жамоаси етакчиларидан бири Зоҳир Пиримовнинг фикрича, мазкур ўйинда ҳар икки жамоа ҳам 3 очко учун ҳаракат қилади.

- Олдинда бизни анча мураккаб ўйин кутмоқда. Зеро, “Нефтчи” ҳам мусобақа жадвалида юқори ўринлардан бирини эгаллаб турибди. Улар учун очко жуда муҳим. Аммо очко бизга ҳам керак. Биз ўз майдонимизда ўйнаймиз ва шу сабабли ҳам бизни ғалабадан бошқа натижа қониқтирмайди. Биз ҳозирча мавсум аввалида олишни мақсад қилган ўрнимизда эмасмиз. Шу сабабдан ҳам қолган учрашувларда ғалаба қозониш орқали якунда ўзимиз истаган поғонадан жой олишга уринамиз, - дейди тажрибали футболчи.

Таъкидлаб ўтамиз, “Олмалиқ” – “Нефтчи” учрашуви 26 октябрь куни бўлиб ўтади.