Россиянинг Санкт-Петербург шаҳрида "Спорт. Инсон. Саломатлик" номли халқаро илмий конгресс бўлиб ўтмоқда. Эътиборлиси, унда ҳамюртимиз Артур Таймазов ҳам қатнашяпти. Журналистлар фурсатдан фойдаланиб, унинг келажакдаги режалари ҳақида сўраб олишди.

Кўпчиликни ўйлантирган нарса — Таймазовнинг келаси йилги Олимпиада ўйинларида иштирок этиш-этмаслиги бўлди. Юртдошимиз бунга алоҳида тўхталиб ўтди:

"Кўзим жиддий операция қилинган. Гарчи жарроҳлик амалиёти кўнгилдагидек якунланган бўлса-да, шифокорлар менга спорт билан шуғулланишни тақиқлаб қўйган. Шундай бўлмаганда ҳам Олимпиадага лицензия берувчи мусобақада қатнашиш учун спорт формамни йиға олмайман. Бу борада муҳокамага бошқа сўз йўқ. Спортдаги фаолиятимни тугатганман", - дейди 3 карра олимпия чемпиони.