Олий лиганинг 28-турида "Пахтакор" Муборакда "Машъал" меҳмони бўлади.
"Машъал" охирги учрашувларда муҳим очколарни қўлга киритиб, турнир жадвалида юқорилашга эришди. Ўз майдонида ушбу жамоа етакчиларга жиддий муаммо яратади.
Олий лига тарихида жамоалар 29 ўйин ўтказган. 20 баҳсда "Пахтакор", 4 беллашувда "Машъал" ғолиб бўлган. 5 учрашувда дуранг қайд этилган. Тўплар нисбати "Пахтакор" фойдасига - 57:19.
"Машъал" ўз майдонида бўлиб ўтган учрашувларда "шерлар"ни 3 бор таслим қилган. Жамоамиз сафарда 7 бор ғалаба қозонган ва 4 марта дуранг ўйнаган.
Биринчи даврада Тошкентдаги ўйинда "шерлар" ғалаба қозонган. Станислав Андреевнинг дубли ва Кахи Махарадзенинг урган голига "Машъал"дан Зафар Тўраев жавоб берганди - 3:1.
Ёшлар таркиблари беллашуви 30 октябрь, жума куни соат 15:00да бошланади. Асосий жамоалар учрашуви 31 октябрь, шанба куни Муборакдаги Баҳром Вафоев номли стадионда 16:00да старт олади.
"МАШЪАЛ" - "ПАХТАКОР"
Ҳакамлар: Рустам Бобомуродов (Навоий), Ҳусниддин Шодмонов (Бухоро), Обид Жумаев (Навоий), Олим Тўйчибоев (Тошкент).
Назоратчи: Ғайрат Каримов (Тошкент).
