Биласиз, бугун Олий Лигада 28-тур учрашувлари старт олди.

Кун доирасидан ўрин олган қизиқарли матчлардан бири “Локомотив” ҳамда “Шўртан” клублари ўртасида кечди. Асосан “темирйўлчилар” устунлиги остида ўтган ўйинда 4:1 ҳисоби қайд этилди.

Ўйиндан кейин ташкил этилган матбуот анжуманининг иккинчи қисмида “Локомотив” бош мураббийи вазифасини бажарувчи Андрей Микляев иштирок этди.

- Қайд этилган натижадан хурсандмиз. Бугун жамоамиз кўрсатган ўйин ҳам ёмон бўлмади. Тўп ўтказиб юбормасак яна ҳам яхши бўларди. Лекин ҳимоядаги кичик хато эвазига бир бор дарвозамиздан тўп олиб чиқдик. Аммо қайсидир футболчига жиддий эътирозимиз йўқ. Бугун майдонга тушган барча ҳам яхши ўйнашга интилди.

Ислом Тўхтаҳўжаевнинг кичик жароҳати бор эди. Шу сабабли ҳам уни дастлабки дақиқалардан майдонга туширмадик. Аммо энди ҳаммаси жойида ва у жамоага ёрдам беришга шай.

Бугун ҳам дарвозада Игнатий Нестеровга ишонч билдирдик. Чунки у айни дамда сафимизда бўлган энг тажрибали посбон. Игнат нафақат ички майдонларда, балки хорижий ареналарда ҳам ўйнашга улгурган. Шуни инобатга олиб, айнан Нестеров бошланғич таркибда майдонга чиқмоқда. У жамоамиздаги биринчи рақамли дарвозабон, - дейди тажрибали мутахассис.