Хабар берганимиздек, бугун Олий Лига 29-тур учрашувлари доирасида “Локомотив” Муборакнинг “Машъал” клубини қабул қилди ва кичик ҳисобда зафар қучди.

Учрашув якунлангач ҳар икки жамоа устозлари иштирокида матбуот анжумани ташкил этилди. Унинг иккинчи қисмида “Локомотив” жамоаси бош мураббийи вазифасини бажарувчи Андрей Микляев журналистларнинг саволларига жавоб қайтарди.

- Учрашувда қайд этилган ҳисоб бизни қаноатлантиради. Аммо жамоамиз кўрсатган ўйиндан кўнгилимиз унчалик тўлмади. Зеро рақиб жарима майдончаси яқинида жуда кўплаб хавфли вазиятлар яратилаётганига қарамасдан, уларни голга айлантириш борасида муаммолар бор экани кўзга ташланмоқда. Қолаверса, бугун тўп узатишларида ҳам узилишлар кузатилди. Шу боисдан ҳам бугунги ўйиндан тўлиқ қаноат хосил қилмадик.

Сўнгги пайтларда ҳужумда асосан Марат Бикмаев ҳаракат қилаётганига сабаб шундаки, Марат бугунги кунда таркибдаги энг кучли ҳужумчи. Унинг жисмоний ҳолати ва ўйинга тайёргарлиги бизни қониқтирмоқда. Шуни инобатга олиб, Темурхўжа Абдухолиқов эмас, балки айнан Марат Бикмаев бошлангъич таркибдан ўрин олмоқда. Ҳа айтганча, Абдухолиқов жамоамиздан кетгани йўқ. Бу ҳақдаги хабарлар миш-мишдан ўзга нарса эмас. У ҳамон таркбимизда ва машгъулотларда ҳамма қатори иштирок этмоқда. Темурхўжанинг жамоамиз билан тузган амалдаги шартномаси бор ва унинг шартнома муддати тугагунига қадар биз билан бўлишига ишонаман.

Иван Нагаев билан эса умуман бошқача ҳолат юз бермоқда. Иван яхши футболчи. Аммо у жуда кўп бор жароҳат олди, қолаверса унда ўйин амалиёти ҳам йўқ. Мавсум сўнгги эканини инобатга олиб, ҳар хил тажрибалар қилишни лозим топмаяпмиз. Шунинг учун у майдонга тушаётгани йўқ.

“Пахтакор” ҳам параллел равишда ўтган ўйинда ғалабага эришди. Демак, уларда чемпионлик учун имконият юқорироқ. Буни тан олишимиз лозим ва рақибни ушбу муваффақият билан табрикласак ҳам бўлади, - дейди “Локомотив” устози.