“Арсенал” клуби бош мураббийи Арсен Венгер Чемпионлар лигасининг 4-туридан ўрин олган “Бавария”га қарши ўйин олдидан ўз фикрлари билан ўртоқлашди.

У ўз сўзида "Бавария"нинг ҳозирги мураббийи Хосеп Гвардиола футболчилик даврида ўзи бошқараётган "Арсенал" таркибида ўйнаш истагини билдиргани ҳақида эслаб ўтган.

"У "Арсенал"да менинг қўлим остида ўйнашни истаганди. Лекин бу вақтда (2001 йил) у 30 ёшдан ошганди. Менда эса унинг амплуасида ҳаракат қиладиган Патрик Виейра ва Эммануэль Пети каби ёш футболчилардан фойдаланиш имкони мавжуд эди. Шунинг учун уни жамоага таклиф этмаганман ва у Италияга йўл олган", дейди Венгер.

Маълумот учун, 1971 йилда туғилган Хосеп Гвардиола 1990 йилдан 2001 йилгача "Барселона" сафида ўйнаган, кейинчалик "Брешия", "Рома", "Ал-Аҳли" ва "Дорадос" каби жамоаларда фаолиятини давом эттирган.