Олий лиганинг 2015 йилги мавсуми яна бир турдан кейин якунига етади. Ҳозирча "Пахтакор" 11-чемпионлик учун яхши имконият ҳосил қилган. Охирги турда Тошкентда "Андижон" доғда қолдирилса, бунга гувоҳ бўлишимиз мумкин.
 
Ортда қолган 29 тур мобайнида жамоа футболчилари ўзларини кўрсатиб келишмоқда. Жумладан, Игорь Сергеев 21 тўп киритиб, тўпурарлар рўйхатида пешқадамлардан бири ва яна 3 голли паси билан гол+пас рўйхатида 24 очко билан пешқадамлик қилмоқда.
 
Гол билан тугаган пас оширишларини энг кўп "Олмалиқ" ярим ҳимоячиси Шавкат Саломов уддалаган. У 11 марта жамоадошлари учун шундай имконият берган. Ундан кейин катта Жасур Ҳасанов 9 ва ярим ҳимоячимиз "Пахтакор" ярим ҳимоячиси Шерзод Каримов 8 мартадан шундай ишни амалга оширишган. Станислав Андреев ҳисобида гол билан тугаган 7та тўп ошириш мавжуд. Стас 8 гол уриб, гол+пас тизимида олий лигада 5-поғонада бормоқда. Бир неча учрашувларда у чап қанот ҳимоячиси ўрнида ҳаракат қилганини ёддан чиқармаслик лозим.

Ёш ярим ҳимоячи Жалолиддин Машарипов майдонда кўп вақт ўйнамаган бўлса-да, фойда келтириш борасида жуда яхши натижага эга. У 3 гол уриб, 6 бор голга сабаб бўлган ҳаракатларни амалга оширган. Шунингдек, жамоадаги қолган футболчиларнинг ишончли ўйинларини ҳам ёддан чиқармаслик лозим.
 
"Пахтакор" 20 ноябрь куни "Андижон"га қарши сўнгги тур учрашувини ўтказади.