Жаҳон чемпионати-2018 иккинчи саралаш босқичи доирасидаги Шимолий Кореяга қарши ўйин олдидан Ўзбекистон миллий терма жамоаси ҳимоячиси Даврон Ҳошимов ҳам Ўзбекистон Футбол Федерацияси матбуот хизматига қисқача интервью бериб, ўйинолди фикралари билан ўртоқлашди.
Миллий терма жамоа таркибида тўрт бора майдонга тушган қанот ҳимоячиси сўнгги йиғинларга доимий равишда жалб этилаётган бўлса-да, асосий таркибдан ўрин олмаётганига изоҳ берар экан, шундай деди:
“Биз бир жамоамиз. Кимнинг асосий таркибда майдонга тушиши муҳим эмас. Бу борада мураббийлар қарорини ҳурмат қиламан. Энг муҳими — ғалаба. Асосий таркибда ким тушишидан қатъий назар ўйинни ғалаба билан якунласак бўлгани”.
Ҳозирги вақтда миллий терма жамоа ўнг қанот ҳимоясида ҳаракат қилаётган Ислом тўхтахўжаев ҳақида гапирар экан 23 ёшли “Пахтакор” ҳимоячиси шундай деди.
“Ислом Тўхтахўжаев жуда яхши футболчи. У ҳимояда доимо тартибли ўйин намойиш этади”.
Шунингдек, Даврон бўлажак ўйинда жамоа ҳужумкор ўйин намойиш этишини ҳам таъкидлади.
“Биз КХДРга қарши ўйинда асосан позицион ва тезкор ҳужумларга таяниб, ҳужумкор ўйин намойиш қиламиз”.
