Ўзбекистон терма жамоаси ўз майдонида Шимолий Кореяни мағлуб этди (3:1). Учрашувда илк голимизга муаллифлик қилган Игорь Сергеев ўз фикрлари билан ўртоқлашди.

"Мураббийлар штаби томонидан ўйинга белгиланган режани тўлиқ бажардик. Ўйин бошида концентрацияни йўқотиб қўйганимиз боис гол ўтказиб юбордик. Шунга қарамай, асло бўшашмадик.

Урган голимга тўхталадиган бўлсам, ёдингизда бўлса, Австралиядаги Осиё кубогида Жепаровнинг пасидан кейин шунақа гол ургандик. Сервер узатма бераётганда бўш жойга очилдим ва зарба бердим.

Бугун ниманинг эвазига ғалаба қозондик. Футболчилардаги профессионаллик, жонфидолик эвазига. Бугун ҳеч ким курашдан қочмади, оёғини тортмади. Қўшимчасига мухлислар ҳиссаси катта бўлди. Уларнинг қўллаб-қувватлаши бизга мадад бўлди.

Ўйлайманки, терма жамоамиз юқори натижаларга эришишга қодир. Таркибимиз кучли футболчилардан ташкил топган", - деди Игорь Сергеев.