Биласиз, бугунги кунда «Реал» етакчиси Криштиану Роналду даромад бобида ҳам тенгсиз. Шунингдек, Мессининг йиллик улуши ҳам чакки эмас, албатта. Табиийки, улар учун даромад манбалари хилма-хил. Яъни биргина маош билан чекланиб қолишмайди. Демак, қуйида энг сердаромад 5 нафар футболчи нималарнинг ҳисобига ақл бовар қилмас даражада кўп пул топаётганини кўриб чиқамиз. Эътиборга олинг, ушбу рейтинг футболчилар маошидан солиқ чегирмалари чиқарилмаган ҳолда тузилган.
5-ўрин - НЕЙМАР
Клуби: «Барселона»
Терма жамоаси: Бразилия
Йиллик даромади: 31,7 млн. доллар
Маош+бонуслар: 14,7 млн. доллар
Реклама улуши: 17 млн. доллар
Ҳомийлари: Nike, Unilever, Panasonic, Konami, Red Bull, Volkswagen...
Бразилиялик футболчи Nike билан тузилган шартнома ортидан йилига 7 млн. доллар олади. Unilever - бу Британия|Голландия қўшма компанияси. У озиқ-овқат ва хўжалик-кимё маҳсулотлари ишлаб чиқариш бобида жаҳондаги етакчилардан бири бўлиб, айни пайт ўз йўналишида савдо ҳажми бўйича 2-ўринда бормоқда. Бразилиялик футболчи ушбу компаниядан йилига нақ 2 млн. доллар санаб олади. Panasonic эса 2013 йили Неймар билан тузилган ҳомийлик келишуви муддатини 4 йилга узайтирди. Ҳамкорлик суммаси сир тутилсада, бемалол айтиш мумкинки, у ҳар икки томонга маъқул. Видеоўйинлар соҳасида етакчилардан бири саналган Konami ҳам футболчига бинойидек пул тўласа керак. Ҳарқалай, компания томонидан яқинда чиқарилган Pro Evolution Soccer 2016 ўйинига айнан Неймар бош ташвиқотчи сифатида танланди. Умуман олганда, бразилиялик иқтидор «Барса»даги ўйинидан кўра, реклама сиймоси орқали кўпроқ пул топади. У бу борада Дэвид Бекхэмга ўхшаб кетади. Зеро, Европага кўчиб ўтишидан олдин ҳам реклама берувчилар орасида машҳур эди. Энди эса каталонияликлар таркибидаги омадли мавсумлардан сўнг реклама бозорида бразилияликка талаб янада ошди. Хусусан, йирик компаниялар ҳам у билан ҳамкорлик қилишга ошиқишмоқда.
4-ўрин - Гарет БЭЙЛ
Клуби: «Реал»
Терма жамоаси: Уэльс
Йиллик даромади: 31,9 млн. доллар
Маош+бонуслар: 25,4 млн. доллар
Реклама улуши: 6,5 млн. доллар
Ҳомийлари: Adidas, EA Sports, Sony Xperia Z3, BT Sport, Lucozade...
Уэльслик вингер ўтган йили энг сердаромад футболчилар рейтингида 6-поғонани банд этганди. У 2015 йил давомида деярли 11 млн. долларга бойиди. Бэйл энди бир неча йил давомида рейтингнинг юқори поғоналаридан тушмаса керак. Чунончи, футболчи Adidas билан 6 йиллик шартнома туздики, бунинг ортидан умумий ҳисобда нақ 35 млн. доллар олади. Бироқ Бэйл учун асосий даромад манбаи барибир, «Реал» клубидир. Тўғри, видеоўйинлар компанияси - EA Sports ҳам Гаретга бинойидек ҳақ тўлайди. Дейлик, FIFA туркумида чиқарилган бир қатор ўйинлари муқовасини айнан Бэйлнинг суратлари билан безади. Қолаверса, футболчи Lucozade, BT Sport каби компаниялар билан ҳам манфаатли шартномаларга эга. Аммо маошнинг салмоғи сезиларли даражада катта, барибир.
3-ўрин - Златан ИБРАГИМОВИЧ
Клуби: «ПСЖ»
Терма жамоаси: Швеция
Йиллик даромади: 41,8 млн. доллар
Маош+бонуслар: 35,8 млн. доллар
Реклама улуши: 6 млн. доллар
Ҳомийлари: Volvo, Nike, Vitamin Well...
Швециялик бўйдор ҳужумчи ҳам асосан Париж клубидаги хизматлари эвазига чўнтагини қаппайтиряпти. Бонус ва мукофот пулларини қўшиб ҳисобласак, парижликлар Златанга бир йилда чамаси 36 млн. доллар тўлашади. Реклама улуши эса нисбатан кам. Тўғри, Златан 3та йирик компания билан ҳамкорлик қилади. Улардан бири - Volvo. Швед концерни ҳужумчига йилига нақ 3 млн. доллар тўлайди. Дейлик, Ибрагимович иштирокида олинган роликни YouTube тизимида нақ 5 млн. марта томоша қилишди. Шундан келиб чиқиб айтсак, Швеция автокорхонаси ҳам футболчи билан ҳамкорликдан етарлича манфаатдор. Ибра шунингдек, Nikeнинг асосий «юз»ларидан бири ҳисобланади. «ПСЖ» ҳужумчисининг яна бир йирик ҳомийси - Vitamin Well (қувватлантирувчи ичимликлар ишлаб чиқаришга мўлжалланган компания). Умуман, Златаннинг катта даромадга яраша, хайрия ишларига кўп эътибор қаратишини ҳам айтиш жоиз.
2-ўрин - Лионель МЕССИ
Клуби: «Барселона»
Терма жамоаси: Аргентина
Йиллик даромади: 70,5 млн. доллар
Маош+бонуслар: 48,5 млн. доллар
Реклама улуши: 22 млн. доллар
Ҳомийлари: Adidas, Pepsi, Turkish Airlines, Gillette, EA Sports, Audemеrs Piguet, Samsung...
«Олтин тўп»нинг 4 карра соҳиби Лионель Месси 2014 йили «Барселона» билан ҳисоб бўйича еттинчи ва энг манфаатли шартномани расмийлаштирди. Бунинг ортидан аргентиналикнинг йиллик маоши 9 млн. долларга етди. Футбол даҳочаси ўз иқтидорини ишга солиб, нафақат майдондаги кароматлари орқали, балки унинг четида ҳам муносиб пул топяпти. Дейлик, 2014 йили Месси Samsung рекламасида темир одам ролида кўриниш берди. Adidas эса футболчи номидаги кийим-кечак ва пойафзалларни савдога чиқарди. Умуман, Лео жуда кўплаб компаниялар билан тузилган катта-кичик шартномаларга эга. Хусусан, Pepsi билан ҳамкорлигини айтиш мумкин.
1-ўрин - Криштиану РОНАЛДУ
Клуби: «Реал»
Терма жамоаси: Португалия
Йиллик даромади: 79 млн. доллар
Маош+бонуслар: 52,2 млн. доллар
Реклама улуши: 26,8 млн. доллар
Ҳомийлари: Nike, Tad Heuer, Herbalife, CR7, Under-Wear, Shirts&Shoes, Clear For Men...
«Реал Мадрид» ҳужумчиси кетма-кет 2-йилдирки, жаҳон футболидаги энг сердаромад ўйинчилар рейтингини бошқариб турибди. Американинг Forbes журнали ҳисоб-китобларига кўра, унинг йиллик моянаси (бонуслар билан бирга) 50 миллион доллардан кўп. Айтганча, Роналду яна бир рейтинг - дунёнинг энг машҳур спортчилари рўйхатида ҳам карвонбошилик қиляпти. Чунончи, унинг Facebookдаги саҳифасини нақ 102 млн. обуначи кузатиб боради. Twitterда эса 32 млн. киши Роналдуга «қўнгил қўйган». Криштиану ҳомийлик шартномаларининг ўзи орқали 25 «лимон»дан кўп топади. Бу ерда ўзига қарашли ва Nike билан ҳамкорликда тараққиётга эришаётган CR7 тармоғи муҳим ўрин тутади. Умуман, футболчи беҳисоб келишувлар соҳибидир. Юқорида санаб ўтилган компаниялардан ташқари, Coca Cola, Castrol, Konami, Banco Espirito Santo, Motorola, Jacob-Co., KFS, Fly Emirates, Samsung, Sacoor Brother кабилар ҳам португалияликни бойишига ҳисса қўшишяпти.
