Фарғона ва Бухоро шаҳарларида олий ва биринчи лига клубларининг тайёрлов гуруҳлари турнири Республика босқич баҳслари ўтказилди.

Водийдаги баҳсларда 1999-2000 йилларда таваллуд ўсмирлар куч синашишди. Мусобақанинг гуруҳ босқичи ҳақида аввалги хабарларимизда маълумот бериб ўтгандик. Дилмурод Абдуллаев устозлигидаги “Бунёдкор-99” футболчилари ярим финалда “Нефтчи” вакиллари билан финал йўлланмаси учун курашишди. Учрашувнинг асосий вақтида ҳисоб очилмади. Шундан сўнг, ғолиб пенальтилар сериясида аниқланди. “Лотореялар баҳси”да “қалдирғочлар” омадлироқ чиқишди ва фарғоналиклардан 5:4 ҳисобида устун келишди. Қашқадарёв дербиси номи остида кечган иккинчи ярим финалда “Насаф” 6:4 ҳисобида “Аланга”ни мағлубиятга учратди.

Бугун ўтган “Бунёдкор” – “Насаф” учрашувида мусобақа ғолиби номи маълум бўлди. Қизиқарли кечган баҳсда “Бунёдкор-99” ҳужумчичиси Аббосбек Жумақулов томонидан киритилган ягона гол “қалдирғочлар”га ғалаба келтирди. Шу тариқа, 1999-2000 йиллар ўртасидаги 2015 йилги тайёрлов гуруҳлари турнирида “Бунёдкор-99” биринчи ўринни қўлга киритди.