“Бунёдкор” футбол клуби ташаббуси билан “Дарвозабон ярим жамоа!” шиори остида очиқ машғулотда иштирок этган "қалдирғочлар" посбони Акбар Тўраев ўз фикрлари билан ўртоқлашди.

- Мен тақдир тақозоси билан дарвозабонликни танлаганман. Ёшлигимда “Чилонзор” жамоасида ўйнаганман. Ўшанда жамоамизнинг бир дарвозабони хорижга йўл олганди, яна бири эса жароҳат олганлиги учун мураббийлар мени майдонга туширишга ва мазкур баҳсда пенальтини қайтарганман, жамоамиз эса ғалаба қозонганди. Шундан сўнг дарвозабонликга қадам қўйганман. Қолаверса, кўча футболида ҳам ҳар доим кичкиналигим учун дарвозага турардим. Қонимда бор бўлса керак деб ўйлайман (кулади).

– Бугунги тадбир жуда ҳам яхши ташкил этилган. Ҳамма хурсанд. Тўғрисини айтсам, “Бунёдкор” академиясида шунчалик кўп яхши савиядаги посбонлар бор деб ўйламагандим. Албатта, бундан кейин ҳам шу каби фестиваллар кўп бўлишини хоҳлардим. Чунки бу тадбирлар дарвозабонларни янада рухлантиради, ўсишга сабаб бўлади. Ундан ташқари, миллий терма жамоамизга номзод дарвозабонларни етказиб бериш осон бўларди, – дейди Акбар Тўраев.