Аввал хабар бериб ўтганимиздек, “Қўқон-1912” жамоаси ушбу мавсумда икки нафар хорижлик футболчиларнинг хизматидан фойдаланишга қарор қилди. Бугунги мақоламизда легионерларнинг фаолиятига тўхталиб ўтамиз.
Универсал футболчи
Россиялик ҳимоячи Игорь Голбан ана шундай таъриф бериш мумкин. У Қўқондаги бир йиллик фаолияти давомида мухлислар меҳрини қозона олди. Голбан асли ҳимоячи бўлишига қарамай, бошқа амплуаларда ҳам тўп сурганига гувоҳ бўлдик. Масалан, Ғузорда “Шўртан”га қарши кечган ўйин олдидан Голбан мураббийларга бугун мени ҳужумга қўйинг гол ураман, дегани таҳсинга сазовор. Ғузорга катта йўқотиш билан йўл олган жамоамизнинг олдинги чизиғида майдонга тушган Голбан ўша куни ваъдасига вафо қилиб рақиб дарвозасини ишғол этди. Шундай кейин 25 ёшли футболчини тез-тез ҳужумда кўрадиган бўлдик.
Сўнгги турда эса Игорнинг яна бир очилмаган қирраси кашф этилди. “Бунёдкор”га қарши кечган ўйин якунланиш арафасида “Қўқон-1912” дарвозабони Руслан Матниёзов қизил карточка олиб майдонни тарк этди. Бу вақтга келиб, жамоамиз учта футболчини алмаштириб бўлганди. Натижада Голбан қўлқопни кийиб дарвоза томон йўл олди. Бу орқали Голбан ҳақиқий универсал ўйинчи эканлигини намойиш этди.
Шунингдек, Голбан мавсум давомида “Қўқон-1912” мудофаа чизиғининг ишончган тоғига айлана олди. Унинг ҳимоядаги ишончли ўйинлари ғалабалар учун замин ятарди.
Мана шундай легионерлар сони мамлакатимизда кўпайишини истаймиз.
Ишончни оқламаган – Аргун
Танганинг орқа томони ҳам бўлгани каби трансферлардан бири ўзини оқламади. Қўқонлик мураббийлар Владимир Аргунга ҳарчанд ишонч билдиришмасин, у рақиблар дарвозасига йўл топа олмади. 24 ёшли ҳужумчининг ҳаркатлари бесамар кетгач, иккинчи даврада россиялик легионернинг шартномаси бекор қилинди.
