“Манчестер Юнайтед” собиқ ярим ҳимоячиси Рой Кин “қизил иблислар” ҳужумчиси Уэйн Руни Чемпионлар Лигаси 5-тури доирасида “ПСВ”га қарши учрашувда намойиш қилган ўйинини таҳлил қилди.

“Дуранг натижада Руни “МЮ”нинг қолган футболчилари каби айбдор. У етакчиликни ўз қўлига олиши керак эди.

Уэйн клуб учун ўзгача қийматга эга ўйинчи ва жамоа таркибида фантастик рекордлар қайд этган. Аммо у жамоа сардори ва бу катта масълуият демакдир. Шунинг учун ҳам Руни барча учрашувларда бор кучи билан ҳаракат қилиши зарур.

Баъзан футболчиларнинг майдон ташқарисида ўзларини тутишларига хайрон бўламан. Ўтган ҳафтада унинг анави рестлерни урганини кўрдим ва “Нега бундай қилди?” деб узоқ ўйладим. Бундан Уэйнга заррача ҳам фойда йўқ.

Руни жамоани ортидан эргаштириши лозим. “ПСВ”га қарши баҳсда у ўз ишини бажармади, бажарса ҳам ишни жуда ёмон амалга оширди”, – дейди Кин Goal.com.