"Манчестер Юнайтед"нинг муваффақиятсиз ўйинлар серияси давом этмоқда. Жамоа ўтган ҳафтада Чемпионлар лигасидан чиқиб кетган бўлса, АПЛ доирасида кетма-кет 3та ўйиндан бери ғалаба қозона олмаяпти. Боз устига, бугун дебютантга имкониятни бой бериб қўйди.

"Борнмут" ўтган турда "Челси" майдонидан ғалаба билан қайтганидан сўнг "МЮ"га қарши анча ишончли ва дадил билан ўйнади. Айниқса, 2-дақиқада киритилган тўп уларнинг ишончига ишонч қўшди. Станислас бурчакдан тўпни тўғри дарвозага жойлади. Де Хеа айланма зарбани ўтказиб юборди.

Ўтказиб юборилган голга қарамай Луи ван Гал шогирдлари ҳисобни тенглаштириш учун олдинга ташланишди. Кетма-кет ҳужумларнинг бирида Феллайни дарвозани ишғол қилди.

Иккинчи бўлимда бурчак тўпи "Борнмут"га муваффақият келтирди. Етказиб берилган узатмани Жошуа Кинг яқин масофадан Де Хеа қўриқлаётган дарвозага жойлаб қўйди. Иккинчи 45 дақиқаликда меҳмонларнинг ўйини унчалик қовушмади. Аксинча, захирадан майдонга тушган, "Челси"га дарвозасига ғалаба тўпини киритган Маррей иккита жуда қулай имкониятдан фойдалана олмади.

Шунга қарамай, "Борнмут" ғалабани сақлаб қолди ва ўз очколарини 16тага етказди. "МЮ" эса 29 очко билан 4-ўринда қолди.

АПЛ, 16-тур
Борнмут – Манчестер Юнайтед 2:1 (1:1, 1:0)
Голлар: 1:0 – 2 Станислас, 1:1 – 24 Феллайни, 2:1 – 54 Кинг.
Борнмут – Боруц, Фрэнсис, Дэниэлс, Смит, Кук, Гослинг, Ритчи, Станислас, Артер (О`Кейн, 86), Кинг (Мюррей, 65), Серман.
Манчестер Юнайтед – Де Хеа, Макнейр (Джонс, 90), Бортуик-Джексон, Варела, Блинд, Феллайни (Пауэлл, 74), Кэррик, Лингард (Перейра, 31), Мата, Депай, Марсьяль.
Огоҳлантиришлар: Перейра (41), Артер (84), Боруц (90).