Хабарингиз бор, Қатар Юлдузлар Лигаси 13-тур учрашувлари доирасидан ўрин олган ўйинда мусобақа жадвалида иккинчи ва учинчи ўринларда бораётган “Ал-Жаиш” ҳамда “Ас-Садд” клублари ўзаро тўқнаш келишди ва унда “Жаиш” 4:2 ҳисобида ғалаба қозонди. Учрашувнинг 50-дақиқасида эса Ўзбекистон миллий терма жамоаси аъзоси Сардор Рашидов ўз номини таблога ёздириб қўйишга эришди.

Шу ўринда таъкидлаш жоизки, Сардор Рашидов киритган гол Юлдузлар лигаси 13-турининг энг чиройли голи дея тан олинди. Қатар юлдузлар лигаси расмий твиттери томонидан ўтказилган сўровномада Рашидов урган голга мухлислар энг кўп овоз беришди. Сардор қолган 3 та таъқибчисини катта фарқ билан ортда қолдирди ва 52 % овоз билан ғолиб бўлди.

Таъкидлаб ўтамиз, Қатар миллий чемпионатида 13 та ўйин ўтказган Сардор Рашидов шу пайтга қадар 9 бор рақиблар дарвозасини ишғол этишга эришди ва у тўпурарлар орасида бормоқда.