Бугун, 17 декабрь куни Лондоннинг "Челси" жамоаси раҳбарияти қониқарсиз натижалар туфайли 6 ой муқаддам жамоага ўтган мавсум чемпионлигини олиб берган бош мураббий Жозе Моуриньога чиқиш эшикларини кўрсатди.
Ҳолбуки унинг ўзи жамоани тушкунлик вазиятидан чиқариб, натижаларни яхшилашга ваъда бераётган, "Челси" билан 10 йиллик шарнома тузишни исташи ҳақида айтган эди.
Қуйида унинг муваффақиятсизликлари йўлини эслаб, ўтган мавсум чемпиони бўлган "Челси"нинг қай тариқа ва қандай сабабларга кўра турнир жадвалининг қуйи қисмига тушиб қолганига жавоб излаб кўрамиз.
Ўзининг харизматик хусусиятлари билан "Special One" лақабини олган мураббий мавсумдаги ҳар бир мағлубиятдан кейин берган интервьюсида ўзига хос важ-корсонларни келтириб ўзини ва жамоани оқлашга ҳаракат қилган.
Тан олиш керакки, унинг баъзи фикрларида жон бор эди.
2 август, «Арсенал» – «Челси» 1:0 (Англия Суперкубоги)
Англиянинг ўтган мавсумги чемпиони "Челси" 2015 йилги Англия Кубоги соҳиби "Арсенал"га қарши Англия Суперкубоги учун майдонга тушди ва мавсумни мағлубият билан бошлади.
"Бугунги ўйинда яхши ўйин кўрсатган жамоа ютқазди. Чунки рақиб футболчилари ўз дарвозасига қаторлашиб жойлашиб олди ва бизга гол уришга имкон қолдирмади"
8 август. «Челси» – «Суонси» 2:2 (АПЛ, 1-тур)
"Челси"да 1-тур ўйиниданоқ муҳит дарз кетди. Уэльсликларга қарши ўйин давомида Эден Азар майдонга йиқилди. Жамоа шифокори Ева Карнейро мураббийдан рухсат сўрамасдан футболчига ёрдам кўрсатиш учун майдонга чопиб кетди, мураббий эса унинг ортидан бақирганча қолди. Моуриньо ўйинда керакли натижа қайд этилмай турган вақтда вақтни чўзишни хато деб ҳисоблаганди.
Шундан сўнг, унинг ташаббуси билан Ева Карнейро жамоадан кетказилди. У ҳозиргача Моуриньо билан судлашиш жараёнида.
Унинг кетиши жамоа футболчиларининг норозиликларига сабаб бўлди...
16 август. «Манчестер Сити» – «Челси» 3:0 (АПЛ, 2 тур)
"Биринчи таймда ғалаба қозонган жамоа ғалабага эришди. Иккинчи таймда эса "Челси" яхшироқ ўйнади. Ҳисоб 3:0 бўлганига чалғиманг. "Манчестер Сити"нинг ярим ҳимоясида муаммолар бор. Уларнинг бир футболчисини майдондан ҳайдаш керак эди. Мен жамоанинг иккинчи таймда кўрсатган ўйинидан қониқиш ҳосил қилдим, лекин бу ғалаба учун етарли эмас".
29 август. «Челси» – «Кристал Пэлас» 1:2 (АПЛ, 4 тур)
"Биз бу ўйинда ғалабага муносиб эдик. Лекин ҳакам ғалаба қозонишимизга йўл бермади. У ўйинда ҳисоб 0:0 кўринишида эканида бизнинг фойдамизга пенальти белгиламади. Шу билан биргаликда, ўз шогирдларидан ҳам норозиман. Жамоа 11 кишидан иборат бўлади, лекин бугун 11 футболчимиз ҳам жон куйдириб ўйнамади".
12 сентябрь. «Эвертон» – «Челси» 3:1 (АПЛ, 5-тур)
"Биз бу ўйинда яхшироқ натижага муносиб эдик. Ҳозир футболчиларим ўзига ишонмаган ҳолда ҳаракат қилмоқда. Барчаси бизга қарши. Ҳужумчиларимиз гол уришни унутишган. Ҳужумчи танасининг исталган жойи билан гол уравериши керак. Муҳими гол. Агар у чиройли зарба бериб, тўпни айлантириб дарвоза устунига теккизса, бу ёмон. Бунинг тарихи узун"
29 сентябрь. «Порту» – «Челси» 2:1 (ЕЧЛ)
"Шундай ҳолатки, бутун ўйинда вазиятни назорат қилдик, лекин кулгули тарзда голлар ўтказиб юбордик. Жамоа умумий планда яхши ўйнади, лекин 2та хато қимматга тушди".
3 октябрь. «Челси» – «Саутгемптон» 1:3 (АПЛ, 8-тур)
"Ҳакамлар "Челси" фойдасига қарор қабул қилишдан қўрқишди. Футболчиларимиз ва мухлисларимизга нисбатан адолатсизлик бўлди. Ўша вазиятда пенальти берилиши муҳим эди, жамоа эндигина муваффақиятсиз стартдан ўнглана бошлаганди".
24 октябрь. «Вест Ҳэм» – «Челси» 2:1 (АПЛ, 10-тур)
Моуриньо бу ўйин вақтида ҳакамларга босим ўтказишда айбланиб, майдон ҳудудидан чиқариб юборилди. У ўйиндан кейин бу вазият ҳамда ўйин бўйича изоҳ беришдан бош тортди.
27 октябрь. «Сток Сити» – «Челси» 1:1, пенальтилар бўйича – 5:4, (Англия Лигаси Кубоги)
"Аввалига 0:1 ҳисобида ютқазаётгандик. Тажрибали рақибга қарши бундай ҳолатда ўйнаш қийин. Жамоа қўлидан келганича ҳаракат қилди. Биз гол уриш учун уринавердик, уринавердик ва гол ҳам урдик. Лекин биттадан ортиқ эмас. Бугунги натижа биз қандай натижага муносиб бўлсак, шундай бўлди".
31 октябрь. «Челси» – «Ливерпуль» 1:3 (АПЛ, 11-тур)
"Мен сизга ҳеч нарса айтмайман".
7 ноябрь. «Сток Сити» – «Челси» 1:0 (АПЛ, 12-тур)
Моуриньо бу ўйинни дисквалификация туфайли ўтказиб юборди ва сериал томоша қилиш билан машғул бўлди.
5 декабрь. «Челси» – «Борнмут» 0:1 (АПЛ, 15-тур)
"Бизнинг ютқазишимиз адолатсизлик бўлди. Ўйин ҳаками очиқчасига хатолар қилди. Ўйлайманки, ҳимоячилар ўз жарима майдонларида қўл билан ўйнаганларида пенальти белгиланиши керак. "Борнмут" ўз услубида "ақлли" ўйин кўрсатди. Лекин баъзида бундай ўйинни "фэйр-плейдан холи ўйин" ҳам дейишади. Улар ҳеч қаёққа шошилишмади ва жуда кўп вақтни сув ичишга сарфлашди. Бунақаси баскетбол ўйинидаги тайм-аутлардан ҳам баттар".
"Челси" айни вақтда 16 турдан кейин 15 очко тўплаган ҳолда турнир жадвалида 16 ўринда турибди. Жамоани "хавфли ҳудуд"дан 1 очко, "кучли тўртлик"дан эса 14 очко ажратиб турибди. "Челси" Англия Лигаси Кубогини тарк этиб бўлган. Жамоа ЕЧЛда ҳам гуруҳдан қийналиб чиққан.
