Малайзиянинг Куала-Лумпур шаҳрида Осиё Чемпионлар Лигасига қуръа ташланди ва унга кўра, мамлакатимизнинг амалдаги чемпиони - «Пахтакор» «С» гуруҳидан жой олиб, анчагина жиддий рақиблар - Саудия Арабистонининг «Ал-Ҳилол», Эроннинг «Тракторсози» жамоалари билан куч синашиши ойдинлашди. «Локомотив» эса «Фулад» (Эрон), «Ал-Наср» (Бирлашган Араб Амирликлари) клублари билан «А» гуруҳидан ўрин олди.
Мамлакат чемпионатининг бронза медали, Ўзбекистон кубоги-2015 ғолиби бўлмиш Қаршининг «Насаф» клуби эса «D» гуруҳида Бирлашган Араб Амирликларининг «Ал-Айн» ва Саудия Арабистонининг «Ал-Аҳли» жамоалари билан куч синашадиган бўлди. Таъкидлаш лозим, ҳар уч гуруҳдаги тўртинчи жамоа номига «плей-офф» баҳсларидан сўнг ойдинлик киритилади.
Ниҳоят, ОЧЛдаги сўнгги жамоамиз - «Бунёдкор» Осиё Чемпионлар лигасининг гуруҳ баҳсларида қатнашиш учун «плей-офф» босқичида Бирлашган Араб Амирликларининг «Ал-Шабаб» клуби билан Тошкентда учрашиб, унинг қаршилигини енгиб ўтиши лозим бўлади. Мазкур баҳсда ғалаба қозонган жамоа «Ал-Наср» (Саудия Арабистони), «Зобаҳан» (Эрон) ва «Лаҳвия» (Қатар) клублари билан «В» гуруҳидан жой олади.
Қисқача айтганда, рақиблар номи маълум бўлди. Лекин худди шу клубларнинг бу йилги иштирокларини таҳлил қилсак, дилимиз у қадар равшан тортмаслиги аниқ. Чунки, ОЧЛ-2015даги иштирок дарҳақиқат, қониқарли бўлмаган эди. Хўш, клубларимиз янги йилда кўрсаткичлар яхшироқ бўлиши учун нималарга кўпроқ аҳамият қаратишлари керак ва айни пайтда бизнинг «квартет»да қандай камчиликлар мавжуд?
«Пахтакор»
Шубҳасиз, амалдаги чемпион-клубимиз ОЧЛда маълум бир маррани кўзлайдиган бўлса (умид қиламизки, бу марра - камида ярим финал бўлади), ҳужум чизиғини кучайтириши лозим. Чунки айни кунларда «Пахтакор» ҳужумининг «найзаси» ҳисобланган Игорь Сергеевнинг Япония чемпионатига йўл олаётгани ҳақида гап-сўзлар урчиб қолди. Агар жамоа чиндан ҳам, Сергеевни хориж клубига кетишига рухсат берса, аввало, унинг ўрнини босадиган форвард топиб қўйиши лозим. Акс ҳолда, гуруҳ босқичидаги рақиблар ўзларини анча хотиржам сезишларига йўл қўйилган бўлади.
Шунингдек, ярим ҳимоядаги «қора ишлар»ни бажарибгина қолмай, футболчиларни руҳлантириш борасида ҳам яққол етакчи бўлган жамоа сардори - Кахи Махарадзенинг тақдирига ҳам ҳали аниқлик киритилмаган. Ундаги жанговарлик хислати бошқаларга қанчалик руҳий мадад беришини таърифлаш шарт эмас. Шунинг учун жамоа раҳбарлари Кахига янги шартнома таклиф қилишлари лозимга ўхшайди. Клубнинг дарвоза ва ҳимоя чизиқлари эса бизнинг назаримизда, ОЧЛдаги рақибларга дош бера оладигандек туюлмоқда. Ишқилиб, ҳақиқатда ҳам шундай бўлиб чиқсин...
«Локомотив»
Назарий жиҳатдан, «темирйўлчилар»нинг йил аввалидаги таркиби билан ОЧЛда ярим финал у ёқда турсин, финалга ҳам бемалол борса бўларди. Чунки «Локо»нинг йил бошидаги таркиби деярли терма жамоаникидан фарқ қилмасди. Лекин футбол шундай бир спорт турики, унда тахминлар доим ҳам ўзини оқлайвермайди. Бунга биз йил аввалида «Локомотив» мисолида яққол гувоҳ бўлдик. Бизнингча, Вадим Абрамов қўли остидаги ўша жамоага барқарорлик ва ўзига ишонч, шунингдек, дарвозабонга боғлиқ муаммолар панд бериб қўйди. Маъмур Икромовга тўла ҳурматни сақлаган ҳолда айтсак, «темирйўлчилар» ўзлари учун яна бир ишончли посбонни таркибга қўшиб олишса, зарар қилмасди. Чунки бундай масъулиятли ўйинларда «Дарвозабон - ярим ҳимоя» нақли ўзини яққол намоён этиб қўяди. Сўнгги мавсумнинг иккинчи даврасида жамоа барқарорлиги сезиларли даражада ошганини ҳис қилдик. Агар таркибнинг асосий ўзаги сақлаб қолинса, муваффақиятга эришиш ҳеч гап эмас. Айтганча, шу кунларда «темирйўлчилар» африкалик легионер ҳужумчини кўрикка таклиф қилишгани ҳақида миш-мишлар тарқалди. Шунга асослансак, «Локомотив» ОЧЛ учун жиддий тайёргарликни бошлади, чоғи...
«Насаф»
Таъбир жоиз бўлса, ўтган мавсумда мухлисларни хурсанд қиладиган чиройли футбол намойиш этиш борасида қаршиликлар олдига туша оладиган клуб топилмади. Зеро Рўзиқул Бердиевнинг самарали иш фаолияти мобайнида Элдор Суюнов терма жамоа даражасигача ўсди. Қолаверса, Ўткир Юсупов ҳам ундан қолишмаслигини исботлаб бўлди. Демак, дарвоза чизиғидан кўнгил тўқ. Ҳимоя, ярим ҳимоя ва ҳужум чизиқлари ҳам чакки эмас. Лекин «Насаф»да ҳам камчиликлар бор. Қанчалик қизиқ бўлмасин, бу камчилик бевосита жамоа етакчиси - туркманистонлик легионер Артур Геворкян номи билан боғлиқ. Батафсилроқ айтсак, Артурли «Насаф» билан Артурсиз «Насаф» ўйинида катта фарқ бор. Футбол эса жароҳатлардан, дисквалификациялардан кафолатланмаган. Шунинг учун Бердиев қишги йиғин вақтида Геворкянсиз ҳам самара берадиган ўйин услубини шакллантира олса, қаршиликлар узоққа боришади. Умид қиламизки, мутахассис буни уддалайди.
«Бунёдкор»
Тасодифни қарангки, «қалдирғочлар» янги йилда ҳам ОЧЛни «плей-офф»дан бошлайдиган бўлишди. Ўтган йилги ўтиш баҳсида «Бунёдкор» кутилмаган тарзда ўта сифатли футбол намойиш қилиб, «қилкўприк»дан эсон-омон ўтиб олганди. Лекин худди шу ўйин охир-оқибатда «қалдирғочлар» зарарига ишлади. Яъни гуруҳдаги рақиблар «плей-офф»нинг биргина ўйинидаёқ «Бунёдкор»нинг асосий сирини илғаб олишди - Шокир Зуаги. Чунончи, жамоанинг ўйини худди шу легионер орқалигина шакллантириларди. Буни пайқаб қолган рақиблар Зуагини «қулфлаш» орқали унчалик қийналмай, мақсадларига етишди. Тўғри, Сардор Рашидов нималардир қилиб, вазиятни ўзгартиришга интилди, аммо «ёлғиз отнинг чанги чиқмади». Аксига олиб, бу йил Рашидов таркибда йўқ. Лекин Шомуродов, Ҳамдамов ва Ўринбоев каби ёшлар ўтган бир йил мобайнида катта тажриба орттиришди. Ана энди улар ўзларини кўрсатадиган фурсат етди. Кўрамиз, бу ҳақиқатга айланармикан?
Аббосбек, "ИнтерСПОРТ" нашри
