Кеча, 17 декабрь куни “Ўзбекистон” меҳмонхонасининг кичик банкетлар залида “Локомотив” футбол клубини тақдирлаш маросими ўтказилди. Жуда қизғин кечган байрам тадбирида бир қатор хонандалар ўз чиқишлари билан кечага ташриф буюрганларни хушнуд этишди.

Аввалига “Ўзбекистон Темирйўллари” акционерлик жамияти бошқарув раиси биринчи ўринбосари Деҳқонов Даврон Тўлқунович кечани очиб, “Локомотив” футбол клубини жорий мавсумда Ўзбекистон миллий чемпионатида иккинчи ўринни қўлга киритгани ҳамда Ўзбекистон Суперкубогида зафар қучгани билан табриклади.

Тадбирнинг энг асосий қисми шубҳасиз “темирйўлчилар”га кумуш медаллар топшириш маросими бўлди. Ундан аввал эса “Локомотив”нинг бу йилги фаолиятига оид видеоролик катта экранда намойиш этилди. Ундан сўнг мавсумдаги энг чиройли 10та гол залга йиғилганлар ҳукмига ҳавола қилинди. “Локомотив” футбол клубига кумуш медалларни Деҳқонов Даврон Тўлқунович, шунингдек ЎФФ биринчи вице-президенти Сардор Раҳматуллаев ҳамда ПФЛ бош директори Фарҳод Магометов топширишди.

Тадбирнинг энг сўнгги қсмида эса “Локомотив” футбол клуби Бош директор ўринбосари Тўлабек Акрамов бу мавсумда ўзини кўрсатган “Энг яхши футболчилар”га клуб томонидан эсдалик совғаларни топширди. Йил якунларига кўра, қуйидаги номинациялар бўйича футболчилар ғолиб деб топилишди.

1. “”Локомотив” болалар ва ўсмирлар футбол мактаби ривожига қўшаётган ҳиссаси учун” – Эркин Саидов (футбол мактаб директори)
2. “Энг яхши тўпурар” – Санжар Шоаҳмедов
3. “Энг яхши ёш футболчи” – Икром Алибоев
4. “Энг интизомли футболчи” – Тимур Кападзе
5. “Энг яхши дарвозабон” – Игнатий Нестеров
6. “Энг яхши ҳимоячи” – Неманья Яничич
7. “Энг яхши ярим ҳимоячи” – Лутфулла Тўраев
8. “Энг яхши ҳужумчи” – Марат Бикмаев