БААнинг Дубай шаҳрида ўзининг иккинчи йиғинини бошлаган Ўзбекистон олимпия терма жамоаси йиғин давомидаги илк назорат учрашувида КХДР олимпия терма жамоасига қарши майдонга тушди ва 4:2 ҳисобида ғалаба қозонди.
КХДРга қарши учрашувни Самвел Бабаян шогирдлари анча яхши бошлашди ва Игорь Сергеевнинг икки голи эвазига танаффусга 2:0 ҳисобидаги ғалаба билан чиқиб кетишди. Иккинчи бўлимда Самвел Бабаян таркибда бир қатор ўзгаришларни амалга оширди ва бу иккинчи бўлимда ўз самарасини берди. Захирадан майдонга туширилган Ҳусниддин Ғофуров ҳамда Икром Алибоев КХДР олимпия терма жамоаси дарвозасига биттадан тўп киритишди ва якунда терма жамоа ғалабасига ҳисса қўшишди.
Таъкидлаш жоиз, КХДР олимпия терма жамоаси футболчилари ҳам иккинчи бўлимда захирадан майдонга тушган ва терма жамоа дарвозасидан ўрин олган Асилбек Омонов дарвозасини икки бора ишғол этишди. Учрашувнинг сўнгги дақиқалари тенг курашлар остида кечди, аммо дарвозаларга бошқа тўп киритилмади. Шу тариқа, Ўзбекистон олимпия терма жамоаси Дубайдаги йиғин доирасидаги илк назорат учрашувида 4:2 ҳисобида ғалаба қозонишди.
Эслатиб ўтамиз, Келаси йилнинг январь ойида бўлиб ўтадиган 23 ёшгача бўлган футболчилар ўртасидаги Осиё чемпионатига тайёргарлик кўраётган Ўзбекистон олимпия терма жамоаси БААнинг Дубай шаҳрида яна икки ўртоқлик учрашувида майдонга тушади. Режага кўра, Самвел Бабаян бош мураббийлигидаги терма жамоа 23 декабрь куни Сурия, 27 декабрь куни эса Қатар олимпия терма жамоаларига қарши ўйнайди.
Ўртоқлик учрашуви.
Дубай, БАА.
20 декбрь.
Ўзбекистон (U23) – КХДР (U23) – 4:2
Голлар: Игорь Сергеев (27, пенальти, 40), Ҳусниддин Ғофуров (53), Икром Алибоев (79).
Ўзбекистон U23: Абдумавлон Абдужалилов (Асилбек Омонов, 46), Акром Комилов, Жавлон Мирабдуллаев, Максимилиан Фомин (Достон Турсунов, 80), Муҳсинжон Убайдуллаев, Жавоҳир Соҳибов (Қувондиқ Рўзиев, 60), Отабек Шукуров (Абдуллоҳ Олимов, 75), Достон Ҳамдамов (Ҳусниддин Ғофуров, 30), Жамшид Искандеров (с) (Икром Алибоев, 56), Элдор Шомуродов (Жалолиддин Машарипов, 63), Игорь Сергеев (Жасур Ҳакимов, 57,), (Жаҳонгир Абдумўминов, 70).
