Жанубий Корея олимпия терма жамоаси ва “Сеул” ФК ҳимоячиси Шим Санг Мин Корея футбол ассоциациясининг махсус мукофотига сазовор бўлди.

Ушбу мукофотнинг номи “Respect” бўлиб, бу йилдан бошлаб жорий қилинди. “Respect” мукофоти “Ҳалол ўйин” мукофотига муқобил равишда ташкил этилган бўлиб, йил давомида рақибдан энг кўп жабр кўрган ва ўзини вазмин тутган футболчига берилади.

Бу мукофотнинг илк эгаси Шим Санг Мин бўлди. У бу мукофотга йил бошида Таиландда ўтказилган Қирол кубогида ҳамюртимиз Тоҳир Шамсиддиновдан калтак еган бўлса-да характер кўрсатгани учун эришди.

Эсингизда бўлса, йил бошида Таиландда ўтган Қирол кубоги доирасида Ўзбекистон ва Жанубий Корея олимпия терма жамоалари ўзаро учрашишган ва ўйиннинг 86-дақиқасида ҳамюртимиз Тоҳир Шамсиддинов рақиб ҳимоячиси Шим Санг Миннинг юзига бир неча марта мушт туширган эди. Шундан сўнг ЎФФ Корея футбол ассоциациясига узрнома юборган ва бош мураббий Шуҳрат Мақсудовни вазифасидан озод қилиб, Тоҳир Шамсиддиновни 1 йил муддатга футболдан четлатган эди.

Ҳозирда Шим Санг Мин Жанубий Корея олимпия терма жамоаси таркибида Улсан йиғинида иштирок этмоқда ва январда Қатарда ўтадиган Осиё чемпионатига бориши кутилмоқда.

Корейс ОАВлари хабарлари асосида Отабeк ЙЎЛДОШEВ тайёрлади