ФИФА этика қўмитасининг қарори эълон қилингач, Йозеф Блаттер ўзининг футболдан четлатилиши адолатсизлик эканини таъкидлади. Қуйида унинг айрим сўзларидан иқтибос келтириб ўтамиз:

«Мендан бокс қопи сифатида фойдаланаётганларидан афсусдаман. ФИФА президенти - бокс қопи. Мазкур ҳолатнинг футболга таъсир ўтказишидан афсусдаман. Менга бундай муносабат билдиришларини кутмагандим».

«Оғзаки келишувга эришганимизни Платини иккимиздан бошқалар ҳам билганини исботловчи далилга эгаман. Этика қўмитаси буни инкор этяпти, ваҳоланки, Мишелга берилган ўша 2 млн. Швейцария франки молия қўмитаси ҳамда конгресс назоратидан ўтганди. Ҳаммаси рисоладагидек кечганди».

«Мени саккиз йилга четлатишди. Шунга қарамай, ўзим ва ФИФА учун курашаман. Саккиз йил-а... Нима учун?»

«ФИФА қоидаларига кўра, сиз ёзма ва оғзаки келишувга эришишингиз мумкин».

«Ҳозирги ҳолатимдан асло уялмайман, аксинча, афсусланяпман. Мен ўз қарашларига эга шахсман. Шундай қарашларимдан бири - ҳеч қачон пул олмаслик».

«Ўзим учун курашмаяпман. Улар мени - ФИФАга сайланган президентни босим остига олишмоқда. Ҳақ-ҳуқуқларимни тиклаш лозим».

«ФИФА президентини четлатиш ва унинг стадионга келишини тақиқлаш - нотўғри».

«Ҳаммага раҳмат. Мен албатта, қайтаман».

Ў. Умаров тайёрлади