“Барселона” собиқ ярим ҳимоячиси Хавининг футболчилик фаолияти давомида қўлга киритган ютуқлари ҳақида кўпчилик маълумотга эга. Биз Хавининг ҳаёти ҳақидаги 10 та маълумотни эътиборингизга ҳавола этамиз.


1. Ту ғилган куни
Хаби 1980 йилнинг 25 январ куни Испаниянинг кичик Тарасса шаҳарчасида таваллуд топган. Айтишларича у туғилганида 3,4 кг ва 49 см бўлган экан.

2. Илк маоши…
Хави Каталония клубидаги биринчи маошини олган куни тўғри электроника дўконига йўл олади ва маошининг ҳаммасига онаси учун  тостер сотиб олади.
Ўшанда 11 ёшли Хави 24 евро маош олган эди.

3. “Барса” академиясида Хавининг ла қаби нима бўлган?
“Барселона” афсонаси Хавига “Ла Масия” академиясида қандай лақаб қўйганликларини биласизми? Футболчи интервьюларининг бирида уни “машина” деб аташганини айтиб ўтган. Боиси Хави машғулотларда кўп ҳаракат қилган ва ҳамиша ҳаракатлари аниқ чиққан.

4. Хави ҳужумчи бўлганми?
Хави “Ла Масия”га қабул қилинганида аввалига ҳужумчи сифатида ўйнаган. Бироқ тезликда кўплаб болалардан орқада қолиб кетганлиги боис, уни майдоннинг ўрта чизиғига ўтказишган.

5. Кумирлари
Болалигида “Барселона” футболчилари Хосеп Гвардиола, Бернд Шустер ҳамда Фернандо Редондаларнинг мухлиси бўлган.

6. Тадбиркор
Топган маблағларининг бир қисмини кўчмас мулкка сарфлаган. Тарраса ва Барселона шаҳарларидаги уйларидан ташқари у кичик қурилиш фирмасини ҳам очган. Фирмани отаси ва акалари бошқаришади.

7. Болалар мактабини очган
Шахсий маблағига Барселонада “Campus Xavi” деб номланган болалар футбол мактабини очган. Бу ерда 200дан ортиқ каталониялик болакайлар футболнинг сир-асрорларини ўрганишмоқда.

8. Мусиқа шайдоси
Мусиқа тинглашни ёқтиради. Севимли хонандалари Браян Адамс ва Брюс Спрингстин. Ёқтирган композицияси – “Losing my religion”.

9. Бўш вақтида…
Хави бўш вақт топса кўпроқ ухлашни афзал кўради.

10. Хави – ёзувчи
2009 йилнинг 23 апрел кунида Хавининг “Mi vida es el Barsa” (Менинг ҳаётим – Барса) деб номланган автобиографик китоби дунё юзини кўрди. Китоб 20 минг дона нусхада чоп этилиб, қисқа вақт ичида сотилиб кетган.

Фурқат Юсупов тайёрлади