"Барселона" 2015 йилнинг сўнгги ўйинида йирик ҳисобда ғалаба қозонди. "Бетис"га қарши "Камп Ноу"да кечган баҳсда бир нечта эътиборга молиқ воқеалар қайд этилди.

Аввал салбий ҳолатдан бошлаймиз. Учрашувнинг 27-дақиқасида ҳакам "Бетис" дарвозаси томон ноҳақ пенальти белгилади. Юқоридан етказилган тўпни дарвозабон мушти билан уриб юбориб, сўнгра бош билан тўпга интилаётган Мессига урилди. Бу тўқнашув қоидабузарлик эмас эди. 11 метрли нуқта олдига Неймар яқинлашди. Унинг зарбаси тўсинга тегиб қайтди ва ҳимоячи Ракитич билан тўп учун курашда дарвозасини ишғол қилиб қўйди. Шу тариқа ўйинда ҳисоб очилди.

Лионель Месси "Барселона" сафидаги ўзининг 500-ўйинида майдонга тушди. Юбилей ўйинни у голсиз тарк эта олмасди. Бунда унга Неймар ёрдам бериб юборди. Иккала ҳужумчи икки марта "девор" ўйнаб, рақиб мудофаасини ёриб ўтди ва Лео деярли бўш қолган дарвозани ишғол қилди. Бу Мессининг "Барса" формасидаги 425-гол бўлди.

"Барселона" календарь йилда урилган голлар сони бўйича "Реал"га тегишли бўлган рекордни янгилаш учун "Бетис" дарвозасига камида 3та гол уриши керак эди. Улар бу ишни ортиғи билан бажаришди. Иккинчи бўлим бошида ва сўнгида Луис Суарес иккита гол урди. Натижада "кўк-анорранглилар"нинг 2015 йилдаги голлари сони 180тага етди. Анчелотти бошчилигидаги "Реал" 2014 йилни 178та гол билан якунлаганди.

Ушбу ғалабадан кейин "Барселона" яна жадвалнинг энг юқори поғонасига кўтарилган бўлса, Луис Суарес эса 15та гол билан тўпурарлар рўйхатида карвонбоши бўлиб олди.

Каталония суперклуби 2015 йилни мана шундай тарзда юқори нотада якунлади.

Ла лига, 17-тур
Барселона – Бетис 4:0 (2:0, 2:0)
Голлар: 1:0 – 29, автогол Вестерманн, 2:0 – 33 Месси, 3:0 – 46 Суарес, 4:0 – 83 Суарес.
Барселона – Браво, Вермален, Матье (Адриано, 67), Дани Алвес, Бускетс (Бартра, 57), Ракитич, Маскерано, Сержи Роберто (Мунир, 86), Неймар, Месси, Суарес.
Бетис – Адан, Вестерманн (Дигар, 36), Бруно Гонсалес (Пеццелья, 17), Молинеро, Сехудо, Варгас, Ндиайе, Петрос, Себальос, ван Вольфсвинкел, Рубен Кастро (ван дер Варт, 75).
Огоҳлантиришлар: Варгас (27), Петрос (30), Пеццелья (68), Дани Алвес (77).