4 январь куни Фарғонанинг "Нефтчи" жамоаси янги йилдаги илк машғулотларини бошлаши хақида хабар бериб ўтгандик.

Режага кўра, куннинг иккинчи қисмида асосий таркиб футболчилари қароргоҳга йиғилишади ва Анрдей Фёдоров бошчилигида машғулотларни бошлашади. Бош мураббий бугун тонг саҳар Фарғонага Москвадан етиб келган.

Таркибдаги ўзгаришлар мухлисларни қизиқтириши табиий. Ўтган мавсум жамоа шарафини ҳимоя қилган ҳужумчи Рўзимбой Аҳмедов фаолиятини Таиланд чемпионатида давом эттиришга қарор қилди. Маълумотларга кўра, Аҳмедов бугун хорижга йўл олади.

Тажрибали футболчи Акмал Холматов ҳам катта эҳтимол билан янги мавсумни бошқа жамоада бошлаши мумкин. "Нефтчи" ПФК ушбу футболчиларга кейинги фаолиятларида омад тилайди.

Айни пайтда "Нефтчи" ПФК қароргоҳида иш қизғин. Клуб раҳбарияти ва мураббийлар штаби футболчилар билан янги шартномалар ҳамда селекция жараёни борасида иш олиб боришмоқда. Ҳозирча янги номлар борасида аниқ бир маълумот бера олмаймиз. Лекин янги харидлар устида музокаралар кетмоқда.