Испания қироллиги футбол федерацияси “Барселона” клубининг уругвайлик ҳужумчиси Луис Суаресни Испания кубоги доирасида "Эспаньол" жамоасига қарши ўтказилган ўйиндаги хатти-ҳаракатлари учун турнир доирасидаги 2 ўйиндан четлаштирди. Бу ҳақда каталонияликлар жамоаси расмий сайтида маълум қилинган.

6 январь куни ўтказилган “Барселона” ва “Эспаньол” учрашувидан кейин беллашув ҳаками Хуан Мартинес Мунуэра қайдномада Суареснинг ўйин вақтида ҳамда ўйиндан кейин ўзини номақбул тутгани ҳақида билдириб ўтганди.

Бундан олдинроқ, футболчи рақибга ирқий камситувчи сўзлар ишлатгани гумонланаётгани ҳақида хабар берилганди.

Эндиликда футболчи кубок доирасида "Эспаньол"га қарши жавоб учрашувини ҳамда "Барселона"нинг турнирдаги кейинги ўйинини ўтказиб юборади. Каталонияликлар биринчи ўйинни 4:1 ҳисобида ўз фойдасига ҳал қилишганди.

Қайд этиш керакки, "Барселона" бу қарор устидан шикоят қилиши мумкин.