Ёдингизда бўлса, 2015 йилги мавсум якунланганидан кейин сайтимиз орқали унинг якунлари ҳақида турли хил статистик, таҳлилий мақолаларини ёзиб борган эдик. Бугун ҳам ушбу анъанамизни давом эттирган ҳолда ўтган йилги мавсумда жамоамиз шарафини ҳимоя қилган яна битта футболчи хусусида тўхталиб ўтишни жоиз топдик.

Фаолияти давомида бир нечта жамоаларда тўп сурган Илья Ильинни мамакатамизда танимайдиган футбол мухлиси бўлмаса керак. Майдонда ўзининг меҳнаткашлиги билан бошқалардан ажралиб турадиган 30 ёшли ҳимоячи ўтган мавсумда жамоамизнинг етакчисига айланди, десак муболаға бўлмайди.

Унинг ҳимоядаги ишончли ўйинлари “Қўқон-1912”нинг ғалабаларига замин яратди. Ильин-Голбан ҳимоя жуфтлиги Олий лига жамоаларига ҳақиқий бош оғриқ бўлди.

Мавсум-2015да Илья Илиьн 27 та учрашувда майдонга тушди. Энг кўп ўйнаган футболчилар орасида у иккинчи ўринни олди.

Ильинни том маънода меҳнаткаш ўйинчи дейиш мумкин. У майдондаги тиришқоқлигидан ташқари, машғулотларда тинмсиз меҳнат қилиши орқали ҳам барчанинг меҳрини қозона олган.

Янги мавсумда ҳам Илья Ильиндан мана шундай ишончли ўйин кутиб қоламиз.