Аввал хабар қилганимиздек бугун “Насаф” жамоаси Тошкентда Наманганнинг “Навбаҳор” жамоасига қарши назорат учрашуви ўтказди.

Ушбу учрашувда “аждарлар” 2:1 ҳисобида ғалаба қозонишди. Учрашувдаги голларга айни пайтда жамоа сафида кўрикдан ўтаётган Ильдар Маматказин ва жамоанинг ўтган мавсумдаги тўпурари  Илҳом Шомуродовлар киритишди.

Рўзиқул Бердиев назорат учрашувидан сўнг ўйинчиларга уч кунлик дам олиш эълон қилди. Жамоа 20 январ куни яна Қарши шаҳридаги ўз базасида йиғилади.

25 январ куни жамоа Тошкентга сафар уюштиради ва 26 январда Тожикистоннинг  “Истиқлол” жамоаси билан назорат учрашуви ўтказади. Учрашув “Бунёдкор” футбол академиясига қарашли майдонда соат 15:00да бошланиши белгиланган.

“Насаф” жамоаси бу йилги илк хорижий йиғинга 26 январ куни йўл олади. Бу йиғин Бирлашган Араб Амирлигида ўтказилади. У ердаги йиғинда  шунингдек бир қанча назорат учрашувлари ҳам ўтказилиши режага киритилган.

Эслатиб ўтамиз, жамоа учун бу йилги футбол мавсуми 19 февралдан бошланади. Шу куни “Насаф” жамоаси “Пахтакор”га қарши Ўзбекистон Суперкубоги учрашувида майдонга тушади.

Февралнинг 24-куни эса ОЧЛ-2016 доирасидаги  Саудия Арабистони Жидда шаҳрининг “Ал-Аҳли” клубига қарши ўйнайди. Учрашув Жидда шаҳрида бўлиб ўтади.

Ушбу хабар “Насаф” ПФК матбуот хизмати билан ҳамкорликда тайёрланди.