Россиялик теннисчи Мария Шарапова Australian Open турнирининг 1/8 финал босқичига йўлланма олди. Учинчи раундда теннисчи америкалик рақиби Лорен Дэвисни мағлубиятга учратди.

Бу россиялик теннисчининг фаолияти давомида эришган 600-ғалабаси бўлди.

Турнирнинг бешинчи тартиб рақамли спортчиси сифатида қайд қилинган Шарапова рақибидан уч сетга кўра (6:1, 6:7 (5:7), 6:0) устун келди. Учрашув 2 соат 14 дақиқа давом этди. Россиялик теннисчи нимчорак финалда швейцариялик Белинда Бенчичга қарши кортга чиқади.

Australian Open —«Катта дубулға» туркумига кирувчи дастлабки мусобақа бўлиб, 18-31 январь кунлари Австралиянинг Мельбурн шаҳрида бўлиб ўтади. Турнирнинг умумий соврин жамғармаси 30 миллион долларни ташкил қилади.