Қатарда ўтаётган 23 ёшгача бўлган футболчилар ўртасидаги Осиё чемпионатининг дастлабки ярим финал учрашуви бўлиб ўтди. Япония ва Ироқ олимпия терма жамоалари мусобақанинг финали ва Рио-2016 йўлланмаси учун майдонга тушишди.

Учрашувнинг 23-дақиқасида японлар тезкор қарши ҳужум ташкил қилишди ва чап қанотдан етказилган узатмани Юя Кубо яқин масофадан дарвозага жойлади. Бўлим тугаши арафасида эса ироқлик ҳимоячи Саад Нотиқ бош билан ҳисобни тенглаштирди.

Иккинчи бўлимда ироқликлар устунликка эришишга ҳаракат қилишди, аммо дарвозани ишғол қила олишмади. Ўйин сўнгида Япония босимни оширди ва қўшиб берилган дақиқаларда ғалабани илиб кетди. Харакаванинг жарима майдончаси ташқарисидан йўллаган зарбасини Фаҳад Толиб қайтара олмади.

Шу тариқа, Япония олимпия терма жамоаси мусобақанинг дастлабки финалчисига айланди. Шунингдек, улар Рио-2016 йўлланмасига ҳам эга бўлишди. Ироқ эса 29 январь куни олимпиада йўлланмаси учун майдонга чиқади.

Ёшлар ўртасида Осиё чемпионати, ярим финал
ЯПОНИЯ - ИРОҚ - 2:1
Голлар: Юя Кубо (23), Харакава (90+3) — Саад Нотиқ (43)