Кучли бешлик чемпионатларида энг кўп чемпионликни қўлга киритган жамоалар қайсилар? Ушбу саволга жавоб топишни истасангиз, қуйидаги мақолани ўқишингизни тавсия қиламиз.



10. «Атлетико» - 10 чемпионлик
Мадриднинг «Атлетико» клуби Испанияда «Реал» ва «Барса»га муносиб рақобат кўрсата олишини ўтган мавсум исботлаб берди. «Матрасчилар» ўз тарихларида 10 марта мамлакат чемпионлигини қўлга киритишган.



10. «Сент-Этен» – 10 чемпионлик
Франция чемпионатида энг кўп чемпионликни нишонлаган жамоа бу «Сент-Этен» клубидир. Ушбу клуб 1957-1981 йиллар оралиғида нақ 10 марта Франция чемпионлигини тантана қилган. Бироқ мана 35 йилдирки «Сент-Этен» чемпионлик шохсупасига яқинлаша олмаяпти.



9. «Арсенал» - 13 чемпионлик
«Арсенал» 30-йилларда 5 марта Англия чемпионлигини қўлга киритади. Шундан сўнг Венгер даврида жамоа яна 3 бора шохсупага кўтарилади. «Канонирлар» умумий ҳисобда 13 марта чемпионликни нишонлашган ва бу борада улар Англияда 3-ўриндалар.



6-8. «Милан» - 18 чемпионлик
«Милан» Италия чемпионатида 18 марта шохсупага кўтарилган. Миланликлар олтин даври 80 йиллар охири – 90 йиллар бошларига тўғри келади. Голланд триоси даврида «Россонерилар» 1992-1994 йилларда қаторасига 3 марта ғолибликни қўлга киритишган.



6-8. «Интер» - 18 чемпионлик
Миланнинг иккинчи жамоаси «Интер» ҳам чемпионликни қўлга киритиш борасида ҳамшаҳарлари билан бир хил натижани қайд этган. «Нерадзуррилар» «калчополи» воқеаларидан сўнг 2006-2010 йиллар давомида кетма-кет 5 марта чампион бўлишди.



6-8. «Ливерпуль» - 18 чемпионлик
Ўтган асрнинг 90-йилларига қадар Англияда гегемонлик «Ливерпуль»нинг қўлида эди. «Қизиллар» 1972-1990 йилларда 11 та чемпионликни расмийлаштиришган. Афсуски мана шундай буюк жамоа 26 йилдан бери Англия чемпионати тожини кия олмаяпти.



5. «Манчестер Юнайтед» - 20 чемпионлик
Фергюссон келганидан сўнг Англияда гегемонлик «Манчестер Юнайтед»га ўтди. «Қизил иблислар» Премьер лига ташкил этилгандан бери 24 мавсум ичида 13 бора чемпионликни тантана қилишди. «МЮ» Англияда энг кўп чемпион бўлган жамоадир.



4. «Барселона» - 23 чемпионлик
Каталонияликлар ўз тарихларида 23 бора мамлакат чемпиони бўлишган. «Барса» 1991-1994 йилларда қаторасига 4 марта, 2009-2011 йилларда эса кетма-кет 3 марта чемпионликни нишонлаган.



3. «Бавария» - 25 чемпионлик
Германиядан ушбу рўйҳатда фақатгина битта жамоа ўрин олди. Ким бўларди, албатта «Бавария». Мюнхен клуби 25 марта мамлакат чемпиони бўлган. Клуб 1972-1974, 1985-1987, 1999-2001, 2013-2015 йилларда кетма-кет 3 мартадан Бундеслигада ғолиб чиқишган.



2. «Ювентус» - 31 чемпионлик
Турин суперклуби афсуски 2 та скудеттодан махрум қилинган. Шундай бўлсада «Ювентус»да 31 та чемпионлик мавжуд. «Кекса синьорилар» 1931-1935 йилларда қаторасига 5 мавсум чемпионликни бегона қилишмаган. Шунингдек жамоа сўнгги 4 мавсумда ҳам ғолибликни қўлга киритиб келмоқда.



1. «Реал Мадрид» - 32 чемпионлик
ХХ асрнинг энг кучли жамоаси сифатида эътироф этилган «Реал» 32 бора Испания чемпионлигини қўлга киритган. «Қироллик клуби» 1961-1969 йиллардаги 9 мавсумднинг 8 тасида чемпион бўлишган. Шунингдек Мадридликлар 1986-1990 йилларда иккинчи марта кетма-кет 5 та чемпионликни тантана қилишган.

Юсупов Фурқат