Мавсумга тайёргарликни Наманганда давом эттираётган ёшларимиз ҳам машғулотлар билан чекланиб қолмай назорат ўйинларида майдонга тушишмоқда.
Ўтган ҳафта сўнггида Ёзёвонда “Ёзявон-Лочинлари” билан баҳс юритган ёш “лочинлар” 2:3 ҳисобида имкониятни бой беришганди. Куни-кеча Дурбек Умаралиев бошчилигидаги ёшларимиз яна иккита учрашувда майдонга тушишди. Дастлаб Андижонга сафар уюштирган футболчиларимиз “Андижон” жамоасидаги тенгқурлари билан 1:1 ҳисобидаги дурангни қайд этишди. Ёшларимизнинг голига Бобир Мамаджанов муаллифлик қилди. Жамоа машғулотларида кўплаб футболчилар қатнашаётганлиги сабабли Андижондаги баҳсда ҳамма ўйинчилар иштирок эта олишмаганди. Шу сабабли мураббийлар “Навбаҳор-Умид” футбол мактаби тарбияланувчилари билан яна битта ўйин ташкил этишди. Мазкур учрашувда ҳам кучлар тенг келди – 1:1. Андижонликлар билан келишувга кўра рақиблар эртага яна бир бор баҳс юритишни режалаштиришганди. Бу сафар "Андижон" жамоаси ёшлари Наманганда меҳмон бўлиши керак эди. Лекин, сўнгги паллада учрашув ўтказилмайдиган бўлди. Шу сабабли, ёшларимиз эртага Тўрақўрғон футбол мактабидан етишиб чиққан футболчилардан ташкил топган жамоага қарши майдонга тушадиган бўлишди.
