Воҳид Холбоев мураббийлигидаги “Локомотив-W” аёллар футзал жамоаси Ўзбекистон чемпионатининг 1-турини 6-ўринда якунлади. Бу ҳал қилувчи босқичга йўлланма берувчи сўнгги пағона ҳисобланади.

11 та жамоа иштирок этаётган турнирнинг дастлабки иккита учрашувини бой берган қизларимиз, кейинги икки турда ғолиб чиқишди. Аввалига “Қирқ қиз”ни 2:1 ҳисобида мағлуб этган “Локомотив-W”, мусобақанинг бешинчи кунида “Юз Робод” устидан йирик – 7:2 ҳисобида зафар қучди. Қайд этиш керак, турнирнинг биринчи кунида “темирйўлчилар” дам олишганди.

Ўзбекистон чемпионатининг 2-тур беллашувлари 22-27 февраль кунлари оралиғида яна Тошкент шаҳрида бўлиб ўтади. Регламентга кўра иккинчи босқич якунида 11 та жамоа бир даврали ўйинларни ўтказиб бўлади ва дастлабки олти ўрин эгалари мамлакат чемпионлиги учун кураш олиб боришади.