Испаниянинг “Барселона” клуби ҳужумчиси Лионель Мессининг Аргентина терма жамоаси сафида Рио-де-Жанейро шаҳрида ўтказиладиган ёзги олимпия ўйинларида иштирок этмаслиги расман эълон қилинди. Бу маълумотни Аргентина терма жамоаси бош мураббийи Херардо Мартино тасдиқлади.
“Месси Олимпиадага бормайди. У ҳаддан зиёд кўп ўйинларда майдонга тушяпти. Олдинда Америка Кубоги, ЖЧ-2018 саралаш ўйинлари турибди. Қолаверса, “Барселона”нинг кубок ва чемпионатдаги учрашувлари бор. Бундай ҳолатда Олимпиада ўйинлари ортиқчалик қилади. Тўғри, менга натижа муҳим, лекин бунда футболчининг соғлиғини хавф остига қўя олмайман”, - деди Мартино.
Эслатиб ўтамиз, Лионель Месси 2008 йили Аргентина терма жамоаси таркибида Пекин Олимпиадасида чемпионлик шоҳсупасига кўтарилган эди. Бразилиядаги бу йилги Олимпиада эса 5-21 август кунлари ўтказилади.
