Хабарингиз бор, 10 февраль куни Тошкентда футзал бўйича Осиё чемпионатига старт берилади. Ушбу мусобақа орқали Осиёнинг 5та жамоаси Колумбияда ўтадиган Жаҳон чемпионатига йўлланмани қўлга киритади.
Ўзбекистонлик ФИФА рефериси Равшан Эрматов мусобақа олдидан футзалчилар видео-мурожаатнома йўллаб, уларга омад тилади. Бу ҳақда Ўзбекистон футзал ассоциацияси хабар тарқатди.
"Ўз уйимизда ўтадиган Осиё чемпионатида биз юта олмайдиган рақибнинг ўзи йўқ. Бунинг учун ҳар бир учрашувда боримизни бериб ўйнасак, Ватан шаъни учун майдончага чиқсак, омад албатта биз томонда бўлади. Колумбияда ўтадиган ЖЧда Ўзбекистон терма жамоаси иштирок этадиган, Ўзбекистон байроғи кўтариладиган пайт келди. Бу вазифасини сиз уддалай оласиз, биз сизга ишонамиз, укаларим", - дейди Равшан Эрматов.
Эслатиб ўтамиз, Ўзбекистон терма жамоаси Осиё чемпионатининг "А" гуруҳида Қирғизистон, Саудия Арабистони ва Ливан терма жамоалари билан мусобақага киришади.
