Бугун ОЧЛ плей-офф босқичида “Бунёдкор” “Аш-Шабоб” билан куч синашади. Бу ўйиннинг аҳамияти жуда юқори. Битта учрашувдан иборат баҳс кейинги босқич йўлланмасини ҳал қилади. Шу боис, “Sport” телеканалининг таниқли шарҳловчиси Даврон Файзиевнинг ўйинолди фикрлари билан қизиқдик.

- Ўтган йили ҳам “Бунёдкор” шунақа шароитда ҳаракат қилган эди. Айнан мана шу плей-офф босқичида жуда ажойиб ўйин ва натижа қайд этганди. Бу мавсумда ҳам “қалдирғочлар” кучсиз эмас. Тўғри, рақиб юлдузли таркибга эга, лекин “Бунёдкор” ҳозирги ҳолатида “Аш-Шабоб”ни енгишга кучи етади.

Тахминимча, “Бунёдкор” 2:1 ҳисобида ғалаба қозонади. Менинг умидим, “қалдирғочлар” тезкор гол уриб олишидадир. Тезкор гол бўлса, бизникиларнинг кучли жиҳати қўл келишни бошлайди. Биламизки, “Бунёдкор” тезкор қанот футболчиларига эга. Масалан, Достонбек Ҳамдамов, Элдор Шомуродов. Бу ўйинчилар тезкор футбол тарафдорлари ҳисобланишади. Шу устунликни ишлатиш учун биз тезкор гол уришимиз керак. Рақиб олдинга боради ва зоналар тақдим этади. Шунда улар ҳужум қилаётганда яна битта гол уриб оламиз. Балки ўйин охирида босим остида битта гол ўтказиб юборишимиз мумкин. Шундай бўлсада, 2:1 ҳисобида ғалаба қозонамиз, деб ўйлайман.
 
Агар эртага кимдир об-ҳавони сабаб қилиб мағлубиятини гапирса, унда бу шунчаки баҳона қидирган бўлади, - дейди Даврон Файзиев SPORTS.uz мухбирига.

Эслатиб ўтамиз, “Бунёдкор” - “Аш-Шабоб” учрашуви бугун 17:00 да бошланади. Ушбу ўйинни "Sport" телеканалида Даврон Файзиев шарҳлайди.