Қатар Юлдузлар Лигасида тўп сурадиган ҳамюртларимиз сони икки нафарга етди. Сардор Рашидов билан бир қаторда Санжар Турсунов ҳам Қатар чемпионатида фаолият олиб бормоқда.

Украинанинг “Ворскла” клубини “Умм Салал”га алмаштирган ҳамюртимиз аллақачон янги жамоаси сафида бир нечта ўйинда майдонга тушишга ҳам улгурди. Хўш, тажрибали ярим ҳимоячининг Юлдузлар Лигасидан илк таассуротлари қандай? Буни билиш мақсадида Санжар Турсунов билан боғландик…

— Санжар ака, “Умм Салал” таркибида аллақачон 3 та учрашув ўтказишга улгурдингиз. Қатар чемпионатидан илк таассуротларингиз қандай?
— Таассуротларим – ажойиб. Мени бу ерда яхши қабул қилишди. “Умм Салал” – яхши шаклланган жамоа экан. Қатар чемпионати эса кундан-кунга ривожланиб бораётгани кўриниб турибди. Охирги ўринда бораётган жамоалар ҳам етакчи клубларни кутилмаганда мағлуб этиб қўйиши тез-тез кузатилар экан. Шу сабабдан ҳам ўйинларнинг томошабоплигини ва чемпионатнинг қизиқ кечаётганини таъкидлай оламан.

— Илгари Россия ва Украинада ўйнагансиз. Қатарга кўчиб ўтгач кўрсатиладиган ўйин борасида қандай фарқни сездингиз?
— Ҳамма чемпионатларнинг ҳам ўзига яраша ўйин услуби бор. Шу жумладан, Қатарда ҳам. Бу ерда жисмоний курашга эмас, балки асосан техника ва тактикага асосланган ҳолда ўйин намойиш этиларкан. Россия ва Украинада эса бироз тажовузкорроқ ўйналади.

— Ўзимизнинг миллий чемпионатимизда бир муддат фақат “Локомотив” таркибида ўйнадингиз. Қачондир фаолиятингизни Ўзбекистон жамоаларидан бирида тугатиш режангизда борми?
— Ростини айтадиган бўлсам, ҳали фаолиятимни тугатиш ҳақида умуман ўйлаганим йўқ. Шу боисдан ҳам катта футболдан қачон ва қайси жамоа таркибида кетишимни ҳозирдан айта олмайман. Ҳаммасини вақт кўрсатади…
Зоҳирбек Акрамхонов суҳбатлашди.