Таниқли ирландиялик собиқ футболчи Имон Данфи "Барселона" ҳужумчилари Лионель Месси ва Луис Суарес иштирокида "Сельта"га қарши ўйин вақтида ижро этилган пенальтига ўз муносабатини билдириб ўтди.
"Бундай ҳаракатга рухсат бермаслик керак. Футболчилар рақибга, футболга ва футбол тарихига ҳурмат билан муносабатда бўлишлари керак.
Ўтмишда ҳеч бир етакчи футболчи бундай ҳаракатни амалга оширмасди. Футболни севадиганлар Мессини ҳам севишарди, лекин у бу ҳаракати орқали мухлисларни қаттиқ хафа қилди.
У футболимизнинг обрўсига зарар етказди. Бунинг учун у узр сўраши лозим, мураббийи эса унга ҳайфсан бериши керак. Футболни ва унинг асосларини бундай булғаш керак эмасди.
Футболда рақибни ҳамкасб сифатида кўриш ва уларни ҳурмат қилиш лозим. Сен ким бўлишингдан қатъи назар энг муҳими футболдир. Мессининг бу даражага етишишида мухлислар, унинг рақиблари ва футбол оламидаги бошқа кишиларнинг ҳиссаси катта", дейди Данфи.