Бугун Тошкентдаги “Бунёдкор” Стадионида Қаршининг "Насаф" ҳамда Тошкентнинг “Пахтакор” жамоалари ўзаро куч синашишди. Унда “аждарлар” учрашувнинг 39-дақиқасида Артур Геворкян томонидан киритилган ягона гол эвазига ғалабани тантана қилишди.

Ушбу учрашувидан кейин ташкил этилган матбуот анжуманида дастлаб “Пахтакор” бош мураббийи Нўъмон Ҳасанов иштирок этди ва журналистлар саволларига жавоб берди.

— Бугунги ғалаба билан “Насаф” жамоасини табриклайман. Йигитларга раҳмат, бугун улар бор кучлари билан ҳаракат қилишди. Яна бир бор “Насаф” жамоасини табриклайман.

— Артур Геворкянни қўриқлаш вазифаси кимга топширилган эди-ю, вазифа қай даражада уддаланди?
— Бу ерда ҳеч кимни айбламайман, фақатгина ўша вазиятда Машариповнинг кеч қолгани бизга қимматга тушди.

— Игор Сергеевнинг ўйинига 5 баллик тизимда неча балл қўйган бўлар эдингиз?
— Игорь бугун курашди, интилди, аммо, тўғри очилишда хатога йўл қўйди, Сергеев ёмон ўйнамади.

— “Насаф”нинг бугунги ўйиндаги қайси жиҳатларини юқори баҳолайсиз?
— “Насаф”нинг тўп билан ишлаши, яқин ва узоқ масоафаларга тўп узатилганида футболчиларнинг яхши очилишини билар эдик. Биз бунга тайёр эдик. Бугун ўша ўйин бошидаги биргина хато қимматга тушди.

— Бугунги ўйин “Пахтакор”нинг чемпионлар лигаси доирасидаги ўйинларида футболчиларга рухан таъсир қилмайдими?
— Таъсири бўлади, лекин олдинда ҳали кўплаб кучли жамоалар билан ўйнаймиз, улар орасида “Насаф” ҳам бор.

— “Пахтакор”да Сергеевдан бошқа тузукроқ хужумчи йўқми?
— Биз мавсумлар оралиғида кўплаб футболчиларни йўқотдик, айни пайтда Сергеевдан бошқа яхшироқ формадаги футболчи бизда йўқ.