Бугун Тошкентдаги “Бунёдкор” Стадионида Қаршининг "Насаф" ҳамда Тошкентнинг “Пахтакор” жамоалари ўзаро куч синашишди. Унда “аждарлар” учрашувнинг 39-дақиқасида Артур Геворкян томонидан киритилган ягона гол эвазига ғалабани тантана қилишди.

Учрашувдан кейин ташкил этилган матбуот анжуманининг иккинчи қисмида кубок соҳиби — Қаршининг “Насаф” жамоаси бош мураббийи Рўзиқул Бердиев иштирок этди ва журналистлар саволларига жавоб берди.

— Бугунги ғалабанинг асосий омили нима?
— Бугун бизга бироз омад кулиб боқди. Ўйин тенг курашлар остида кечди, йигитларим ҳам яхши ҳаракат қилишди. Шу фурсатдан фойдаланиб барча бизга ишонган мухлисларни табриклаймиз ва уларга мададлари учун раҳмат айтаман.

— "Насаф”нинг марказидан кўнглимиз тўлди, аммо жамоанинг ўнг қаноти сал сустроқ эди, Сайдулло Раҳматовнинг ўйини унчалик чиқмади.
— Раҳматов ҳали ёш ва у жамоамиз таркибида дебют ўйинида майдонга тушди, умуман у бугун анча яхши ўйнади, унинг келажаги порлоқ.

— Сизни қайси чизиқлардаги рақобатнинг барқарор эмаслиги ташвишга солади?
— Биз асосан ёшларга эътибор қаратамиз, ҳали ёшларимиз ҳам ўсишда давом этишади ва ҳамма чизиқларда рақобат кучаяди.

— Шерзод Аъзамовни алмаштиришдан мақсад нима?
— Биз Шерзодни алмаштиришга мажбур бўлдик, чунки у ўйин давомида жароҳат олди. Унинг ўрнини Деян Болейевич билан тўлдиришимиз мумкин эди, аммо у ҳали ўйнашга тайёр эмас эди.