Хабарингиз бор, кеча Ўзбекистон Суперкубоги учун баҳсда Қаршининг “Насаф” клуби “Пахтакор”ни кичик ҳисобда мағлуб этди ва ўз тарихида илк бор мамлакат Суперкубогига эга чиқди.

Мазкур матчда қаршиликлар сафида энг фаол ўйнаганлардан бири – бу жамоанинг янги аъзоси Дилшод Раҳматуллаев бўлди. Футболчи ўзининг янги клубидаги илк соврини ҳақида қуйидагиларни таъкидлади:

- Суперкубок учун баҳс осон ўтмади, “Пахтакор” футболчилари ҳам майдонга фақат ғалабани кўзлаган ҳолда чиқишганди. Лекин якунда омад бизнинг жамоага насиб этди. Бундан жуда ҳам хурсандман. Янги жамоамдаги илк ўйиндаёқ мана шундай ажойиб сорвин қўлга киритилганидан шодман. Мавсумни соврин билан бошлаш жуда ҳам ёқимли. Насиб этса, бу йил “Насаф” ўз ишқибозларини ажойиб ғалабалар билан хушнуд этишни мақсад қилмоқда. Мавсумни худди стартдаги каби ғалаба билан якунлашни ният қилганмиз, - дейди маҳоратли футболчи SPORTS.uz мухбирига.